پشاور میں ٹارگٹ حملہ: قاری عزت اللہ اور بیٹا ہلاک، دوسرا زخمی، داعش نے ذمہ داری قبول کرلی

واشنگٹن (ش ح ط) پاکستان کے شورش زدہ صوبے خیبر پختونخوا کے دارالحکومت پشاور کے علاقے بورڈ بازار تاج آباد میں موٹرسائیکل سوار حملہ آوروں کی فائرنگ سے جامعہ عصریہ سفید ڈھیری کے معلم قاری عزت اللہ اور ان کا کمسن بیٹا علی ہلاک جبکہ دوسرا بیٹا مرتضیٰ زخمی ہوگیا۔

 پولیس کے مطابق مولانا عزت اللہ نمازِ جمعہ کی ادائیگی کے بعد اپنے دو بیٹوں کے ہمراہ کار پر گھر واپس جا رہے تھے کہ حملہ آوروں نے اندھا دھند فائرنگ کردی۔ واقعے کے بعد لاشوں اور زخمی کو اسپتال منتقل کیا گیا، جہاں زخمی بچے کو طبی امداد فراہم کی جا رہی ہے۔

پولیس کا کہنا ہے کہ اچانک فائرنگ سے علاقہ خوف و ہراس کا شکار ہوگیا۔ ایس پی کینٹ احتراز خان پولیس نفری کے ہمراہ جائے وقوعہ پہنچے اور اہم شواہد اکٹھے کرلیے گئے۔ قریبی مقامات پر لگے سی سی ٹی وی کیمروں کی ریکارڈنگ حاصل کرنے کے بعد نامعلوم افراد کے خلاف مقدمہ درج کرلیا گیا ہے۔ 

پولیس کے مطابق واقعے کی مختلف پہلوؤں، خصوصاً ٹارگٹ کلنگ کے امکان کو مدِنظر رکھتے ہوئے تفتیش جاری ہے۔

دوسری جانب داعش خراسان نے حملے کی ذمہ داری قبول کرنے کا دعویٰ کیا ہے۔