پنجاب: بھکر میں پولیس چیک پوسٹ پر خودکش حملہ، 2 اہلکار ہلاک، 4 زخمی

واشنگٹن (ش ح ط) پاکستان کے صوبہ پنجاب کے ضلع بھکر میں ایک خودکش حملے کے نتیجے میں دو پولیس اہلکار ہلاک جبکہ دو اہلکاروں سمیت چار افراد زخمی ہو گئے ہیں۔

بھکر کے ڈسٹرکٹ پولیس آفیسر (ڈی پی او) شہزاد رفیق کے مطابق ابتدائی تحقیقات سے معلوم ہوتا ہے کہ تحصیل داجل میں قائم ایک پولیس چیک پوسٹ کو نشانہ بنایا گیا۔ حملے میں دو اہلکار ہلاک ہوئے جبکہ دو پولیس اہلکاروں سمیت چار افراد زخمی ہوئے ہیں۔

ڈی پی او کے مطابق داجل کا علاقہ خیبرپختونخوا کے ضلع ڈیرہ اسماعیل خان اور بھکر کی سرحد پر واقع ہے، جہاں پنجاب کو خیبرپختونخوا سے ملانے والے دریا کے پل پر پنجاب پولیس کی چیک پوسٹ قائم ہے۔

پولیس حکام کا کہنا ہے کہ حملہ آور پیدل چیک پوسٹ تک پہنچا۔ 

سی سی ٹی وی فوٹیج میں دیکھا جا سکتا ہے کہ وہ اہلکاروں کے قریب آیا اور معمول کی چیکنگ کے دوران خود کو دھماکے سے اُڑا لیا۔

دوسری جانب پاکستان کے وزیرِ داخلہ محسن نقوی نے واقعے کی مذمت کرتے ہوئے ہلاک اہلکاروں کے لواحقین سے ہمدردی کا اظہار کیا ہے اور زخمیوں کو بہترین طبی سہولیات فراہم کرنے کی ہدایت کی ہے۔

ادھر بھکر میں پولیس چیک پوسٹ پر ہونے والے اس خودکش حملے کی ذمہ داری کالعدم تنظیم اتحاد المجاہدین پاکستان سے وابستہ گروپ انصار الاسلام نے قبول کر لی ہے۔