پنجاب حکومت نے بلوچ لانگ مارچ کو لاہور میں روک دیا

لاہور (ڈیلی اردو/ڈی پی اے): کوئٹہ سے اسلام آباد کی جانب جانے والے بلوچوں کے "حقوق بلوچستان لانگ مارچ" کو لاہور میں روک دیا گیا ہے۔ مارچ کی قیادت جماعت اسلامی بلوچستان کے امیر اور "حق دو تحریک" کے رہنما مولانا ہدایت الرحمن بلوچ کر رہے ہیں۔ لانگ مارچ میں 500 سے زائد افراد شریک ہیں، جنہوں نے پانچ روز قبل کوئٹہ سے سفر کا آغاز کیا۔

مارچ کا مقصد بلوچ عوام کے بنیادی حقوق، لاپتا افراد کی بازیابی، سرحدوں کی بحالی، چیک پوسٹوں پر تذلیل کا خاتمہ اور معدنیات پر حق کا مطالبہ کرنا ہے۔ شرکاء کا کہنا ہے کہ وہ پرامن انداز میں اپنے آئینی و جمہوری حقوق کی خاطر اسلام آباد جانا چاہتے ہیں۔

منگل کی صبح جب شرکاء لاہور کے منصورہ مرکز سے نکلنے لگے تو پولیس نے انہیں روک لیا۔ ملتان روڈ بند کر دی گئی، اور پولیس، لیڈیز فورس، واٹر کینن و قیدیوں کی گاڑیاں موقع پر تعینات کی گئیں۔ پولیس نے تمام راستے بند کر دیے اور شرکاء کو باہر آنے کی اجازت نہ دی۔

پنجاب حکومت کی جانب سے مذاکرات کی کوشش کی گئی۔ سینئر وزیر مریم اورنگزیب نے مطالبات کی منظوری کی یقین دہانی کروائی، لیکن بلوچ قیادت نے اسے مسترد کر دیا، یہ کہہ کر کہ صوبائی حکام کے پاس اختیار نہیں۔ وزیراعلیٰ مریم نواز نے جماعت اسلامی کے رہنما لیاقت بلوچ سے فون پر بات کی اور ثالثی کی اپیل کی۔

مولانا ہدایت الرحمن نے الزام لگایا کہ انہیں لانگ مارچ سے پیچھے ہٹنے کے لیے دھمکیاں دی جا رہی ہیں اور ایک سینئر پولیس اہلکار نے انہیں جانی نقصان کی دھمکی دی ہے۔ ان کا کہنا تھا کہ “میڈیا پر ہمارا بلیک آؤٹ کیا جا رہا ہے، لیکن عوام کی جانب سے مثبت ردعمل ملا ہے۔”

جماعت اسلامی کے سیکرٹری جنرل امیر العظیم نے حکومت کی کارروائی کو "اوچھے ہتھکنڈے" قرار دے کر شدید مذمت کی اور مطالبہ کیا کہ مظاہرین کو بغیر رکاوٹ آگے بڑھنے دیا جائے۔

لانگ مارچ کی قیادت نے اعلان کیا ہے کہ وہ ہر صورت میں بدھ کی صبح اسلام آباد روانہ ہوں گے، چاہے حکومت راستہ دے یا گرفتار کر لے۔