پنجاب: خانیوال کے علاقے میاں چنوں سے داعش کے دو دہشت گرد گرفتار

اسلام آباد (ش ح ط) کاؤنٹر ٹیررازم ڈیپارٹمنٹ ( سی ٹی ڈی ) نے خفیہ اطلاع پر کارروائی کرتے ہوئے کالعدم تنظیم داعش کے دو دہشت گردوں کو گرفتار کرکے بارودی مواد، سیفٹی فیوز اور دستی بم برآمد کرلیا۔

تفصیلات کے مطابق صوبہ پنجاب کے ضلع خانیوال کی تحصیل میاں چنوں میں سی ٹی ڈی نے خفیہ اطلاع پر کارروائی کرتے ہوئے کالعدم تنظیم داعش کے دو دہشت گردوں کو گرفتار کر کے اسلحہ اور دستی بم برآمد کر لیا۔ گرفتار دہشت گردوں میں ریاض احمد اور عمران حیدر شامل ہیں۔

سی ٹی ڈی نے کہا کہ دہشت گردوں کے قبضے سے دستی بم، اسلحہ اور ممنوعہ لٹریچر بھی برآمد کرلیا، ذرائع کے مطابق دہشت گردوں کا ہدف اہم تنصیبات اور عبادت گاہیں تھیں۔

دہشت گردوں کو مزید تحقیقات کے لیے نامعلوم مقام پر منتقل کردیا گیا ہے۔

مغربی بائی پاس سے گرفتار کئے گئے دو دہشت گردوں کے خلاف مقدمہ درج کرلیا گیا ہے، مقدمہ دہشتگردی کی دفعات کے تحت تھانہ سی ٹی ڈی ملتان میں درج کیا گیا۔