پنجاب: ساہیوال سے کالعدم تحریک طالبان پاکستان کا دہشت گرد گرفتار

لاہور (اے ڈی شہزاد) کاونٹر ٹیرازم ڈیپارٹمنٹ پنجاب (سی ٹی ڈی) کی ساہیوال میں اہم کارروائی کرتے ہوئے کالعدم تنظیم تحریک طالبان پاکستان سے تعلق رکھنے والے مبینہ دہشت گرد کو گرفتار کرلیا گیا۔

ترجمان سی ٹی ڈی پنجاب کے مطابق خفیہ اطلاعات پر کارروائی کے دوران سی ٹی ڈی نے صوبہ پنجاب کے ضلع ساہیوال بائی پاس کے قریب سے کالعدم تنظیم ٹی ٹی پی کے ایک اہم دہشت گرد کو گرفتارکرلیا۔ دہشت گرد کا تعلق تحریک طالبان پاکستان غازی فورس سے ہے۔

دہشت گرد کے قبضے سے دستی بم اور اسلحہ بھی برآمد کيا گيا ہے۔ برآمد پستول پر انگریزی میں “اسپیشل گفٹ” کے الفاظ درج ہیں۔

ترجمان کا کہنا ہے کہ گرفتار دہشت گرد کے خلاف سی ٹی ڈی تھانے میں مقدمہ درج کیا گیا ہے۔ دہشت گرد باجوڑ ایجنسی کا رہائشی ہے، جس سے پستول، تین ہینڈ گرینڈ اورنقدی برآمد ہوئی۔ دہشت گرد کو تفتیش کیلئے نامعلوم مقام پر منتقل کردیا گیا۔