پنجاب میں سی ٹی ڈی کے آپریشنز: القاعدہ، داعش اور ٹی ٹی پی کے 89 دہشت گرد گرفتار

لاہور (نمائندہ ڈیلی اردو) ‏کاؤنٹر ٹیررازم ڈیپارٹمنٹ (سی ٹی ڈی) نے کہا ہے کہ گزشتہ تین ماہ کے دوران پنجاب بھر میں 940 انٹیلی جنس بیسڈ آپریشنز کیے گئے جن کے نتیجے میں 89 دہشت گردوں کو گرفتار کیا گیا۔

سی ٹی ڈی کی جانب سے جاری کردہ بیان میں بتایا گیا کہ پنجاب کے مختلف شہروں سے گرفتار دہشت گردوں میں 14 لاہور سے، 14 راولپنڈی سے، سات فیصل آباد سے، سات بہاولپور سے، چھ جھنگ سے، چھ سرگودھا سے، پانچ ساہیوال سے، چار گوجرانوالہ سے جبکہ تین، تین بہاولنگر اور گجرات سے پکڑے گئے۔

بیان کے مطابق گرفتار ہونے والے دہشت گردوں میں سے 55 کا تعلق کالعدم تحریک طالبان پاکستان سے ہے، پانچ داعش (اسلامک اسٹیٹ) سے، جبکہ دو، دو دہشت گرد القاعدہ، حزب التحریر اور جئے سندھ سے وابستہ تھے۔

سی ٹی ڈی کے مطابق کارروائیوں کے دوران 20.2 کلوگرام دھماکہ خیز مواد، 85 ڈیٹونیٹر، 183 فٹ سیفٹی فیوز وائر، 717 کالعدم تنظیموں کے پمفلٹس اور میگزینز، ڈیٹونیٹنگ کورڈ، موبائل فون اور نقدی بھی برآمد کی گئی۔ گرفتار ملزمان کے خلاف 87 مقدمات درج کر لیے گئے ہیں اور تفتیش جاری ہے۔

بیان میں کہا گیا کہ گرفتار دہشت گرد اہم سرکاری اور حساس عمارتوں پر حملے کی منصوبہ بندی کر رہے تھے تاہم سی ٹی ڈی پنجاب چوکس ہے اور دہشت گردوں و ریاست مخالف عناصر کو انصاف کے کٹہرے میں لانے کے لیے پرعزم ہے۔

مزید بتایا گیا کہ رواں ہفتے کی سیکیورٹی سرگرمیوں میں مقامی پولیس اور دیگر سیکیورٹی اداروں نے 13 ہزار 521 کومبنگ آپریشنز کیے، جن میں پانچ لاکھ 52 ہزار 692 افراد کی جانچ پڑتال کی گئی۔ ان کارروائیوں میں 1131 مشتبہ افراد کو گرفتار کیا گیا، 1061 مقدمات درج ہوئے اور 906 مختلف برآمدگیاں کی گئیں۔