پنجاب: گوجرانوالہ اور چینوٹ سے 4 دہشت گرد گرفتار

لاہور (اے ڈی شہزاد) کاؤنٹر ٹیررزم ڈیپارٹمنٹ پنجاب نے صوبے بھر میں کارروائیوں کے دوران چار دہشت گردوں کو گرفتار کرلیا۔

ترجمان کاؤنٹر ٹیررزم ڈیپارٹمنٹ پنجاب کے مطابق صوبے بھر میں کارروائیوں کے دوران 4 دہشت گردوں کو گرفتار کرلیا گیا ہے، گرفتار دہشت گردوں کے قبضے سے بارودی مواد، اسلحہ اور بم بنانے کا دیگر سامان برآمد ہوا ہے۔

کاؤنٹر ٹیررزم ڈیپارٹمنٹ کی جانب سے جاری کردہ بیان کے مطابق ضلع چینوٹ سے گرفتار دہشت گرد کالعدم تنظیم کا اہم رکن ہے، جس کی شناخت عثمان سعید کے نام سے کی گئی ہے۔

دوسری جانب ضلع گوجرانوالہ میں کارروائی کے دوران تین دہشت گردوں کو گرفتار کیا گیا، جن کی شناخت اشرف، حبیب اور یوسف کے ناموں سے کی گئی۔ دہشت گردوں کے قبضے سے بارودی مواد اور دیگر اسلحہ برآمد کیا گیا ہے۔

دہشت گرد حساس مقامات اور سیکیورٹی فورسز کو نشانہ بنانا چاہتے تھے۔

ملزمان کا تعلق مختلف کالعدم جماعتوں سے ہے۔ گرفتار دہشت گردوں کو نامعلوم مقام پر منتقل کر دیا گیا۔ جن سے پوچھ گچھ کا سلسلہ جاری ہے۔ اہم انکشافات کی توقع ہے۔