پنجگور میں سکیورٹی فورسز کا آپریشن، 5 دہشتگرد ہلاک

پنجگور(ڈیلی اردو)  بلوچستان کے شورش زدہ ضلع پنجگور کے علاقے کلی سوران میں سکیورٹی فورسز نے انٹیلی جنس کی بنیاد پر کارروائی کرتے ہوئے 5 دہشتگردوں کو ہلاک کردیا، جبکہ متعدد دہشتگرد زخمی ہوگئے۔

سکیورٹی ذرائع کے مطابق کارروائی کے دوران جدید ٹیکنالوجی کی مدد سے دہشتگردوں کو نشانہ بنایا گیا۔ ہلاک ہونے والے دہشتگرد موٹر سائیکلوں پر سوار تھے اور ایک بڑی دہشتگرد کارروائی کی منصوبہ بندی کر رہے تھے۔

ذرائع کے مطابق آپریشن کے دوران دہشتگردوں کے قبضے سے جدید اسلحہ، گولہ بارود، 3 گاڑیاں، 2 موٹر سائیکلیں اور ایک آئی ای ڈی برآمد ہوئی، جبکہ کالعدم تنظیم کا جھنڈا بھی قبضے میں لے لیا گیا۔

سکیورٹی ذرائع کا کہنا ہے کہ ہلاک دہشتگرد مقامی افراد سے لوٹ مار، بھتہ خوری، اغوا برائے تاوان اور ٹارگٹ کلنگ سمیت مختلف جرائم میں ملوث تھے اور خودکش حملوں کی منصوبہ بندی بھی کر رہے تھے۔