ڈیرہ اسماعیل خان میں دہشت گردوں کی فائرنگ، سی ٹی ڈی اہلکار شہید، ایک زخمی

ڈی آئی خان (توقیر حسین زیدی) خیبر پختونخوا کے ضلع ڈیرہ اسماعیل خان میں دہشت گردوں کی فائرنگ سے سی ٹی ڈی کا حوالدار شہید جبکہ ایک اہلکار زخمی ہوگیا۔

تفصیلات کے مطابق خفیہ اطلاع پر سی ٹی ڈی نے ڈیرہ اسماعیل خان کے علاقے رمک میں دہشت گردوں کے خلاف آپریشن کا آغاز کیا تو دہشتگردوں نے سی ٹی ڈی اہلکاروں پر فائرنگ شروع کردی۔فائرنگ کے تبادلہ میں حوالدار نور علی شاہ موقع پر شہید جبکہ جوان جہانگیر شدید زخمی ہوگیا۔فائرنگ کے بعد پولیس کی بھاری نفری پہنچ گئی۔

پولیس اور دہشتگردوں کے درمیان کئی گھنٹوں تک مقابلہ جاری رہنے کے بعد دہشتگرد فرار ہونے میں کامیاب ہوگئے۔ علاقہ میں دہشتگردوں کے خلاف پولیس کا سرچ آپریشن تاحال  جاری ہے۔

دوسری جانب مقابلہ میں شہید ہونے والے حوالدار کا نماز جنازہ پولیس لائن میں ادا کر دیا گیا۔ نماز جنازہ کے بعد شہید کی جسد خاکی اپنے آبائی علاقہ ٹانک روانہ کردی گئی۔