ڈیرہ اسماعیل خان میں سیکورٹی فورسز کا آپریشن، طالبان کے شیڈو گورنر سمیت 9 شدت پسند ہلاک

واشنگٹن (ش ح ط) خیبر پختونخوا کے ضلع ڈیرہ اسماعیل خان میں شدت پسندوں کے خلاف سیکورٹی فورسز کے آپریشن میں کالعدم تحریک طالبان پاکستان (ٹی ٹی پی) کے شیڈو گورنر کمانڈر ثاقب گنڈا پور سمیت 9 شدت پسند مارے گئے۔

ڈیلی اردو کے مطابق کلاچی کے علاقے ہتھلہ میں شدت پسندوں کی موجودگی کی اطلاع پر سکیورٹی فورسز نے انٹیلی جنس کی بنیاد پر آپریشن کیا۔ جس کے دوران طالبان کے شیڈو گورنر ثاقب گنڈا پور سمیت 9 دہشت گرد ہلاک ہو گئے۔

پاکستان کی فوج کے شعبہ تعلقات عامہ آئی ایس پی آر نے بھی کمانڈر سمیت 9 شدت پسندوں کی ہلاکت کی تصدیق کردی۔

آئی ایس پی آر کے مطابق ہلاک ہونے والے شدت پسند علاقے میں دہشت گردی کی متعدد سرگرمیوں میں ملوث تھے اور قانون نافذ کرنے والے اداروں کو انتہائی مطلوب تھے۔ بیان کے مطابق سیکیورٹی فورسز کے کسی اہلکار کو کوئی جانی نقصان نہیں پہنچا۔

دوسری جانب کالعدم تنظیم نے ڈیرہ اسماعیل خان کے ولی ثاقب گنڈا پور اور انکے 9 ساتھیوں کی ہلاکت کی تصدیق کردی ہے۔

کالعدم تحریک طالبان پاکستان نے کہا ہے کہ ’وہ جلد ہی ثاقب گنڈا پور کی ہلاکت کا انتقام لیں گے۔‘

واضح رہے کہ گزشتہ ماہ کی 25 جنوری کو بھی سیکیورٹی فورسز کی ایک آپریشن میں کالعدم تحریک طالبان پاکستان کے ضلع خیبر کیلئے نامزد شیڈو گورنر کمانڈر عزیر الرحمٰن عرف قاری، اپنے چار ساتھیوں سمیت مارا جا چکا ہے۔