ڈیرہ اسماعیل خان میں سیکورٹی فورسز کا آپریشن، 2 خودکش بمباروں سمیت 7 شدت پسند ہلاک

راولپنڈی (ک م) پاکستان کے شورش زدہ صوبے خیبر پختون خوا کے ضلع ڈیرہ اسماعیل خان میں سیکورٹی فورسز نے آپریشن کرتے ہوئے دو خودکش بمباروں سمیت سات شدت پسندوں کو ہلاک کردیا ہے۔

پاکستانی فوج کے شعبہ تعلقات عامہ آئی ایس پی آر کے مطابق سنیچر کے روز سکیورٹی فورسز نے ڈیرہ اسماعیل خان کے علاقے کلاچی میں شدت پسندوں کی موجودگی کی اطلاع پر انٹیلی جنس پر مبنی آپریشن کیا۔

آئی ایس پی آر کے مطابق آپریشن کے دوران پاکستانی فوجیوں نے شدت پسندوں کے مقام کو موثر انداز میں گھیر لیا اور اس کے نتیجے میں تین افغان اور دو خودکش بمباروں سمیت سات شدت پسندوں کو ہلاک کیا۔

آئی ایس پی آر نے اپنے بیان میں کہا ہے کہ ’پاکستان افغان حکومت سے توقع کرتا ہے کہ وہ اپنی ذمہ داریوں کو پورا کرے گی اور پاکستان کے خلاف دہشت گردوں کی کارروائیوں کے لیے اپنی سرزمین کو استعمال نہیں کرنے دے گی۔‘

فوج کے مطابق اس علاقے کو شدت پسندوں سے پاک کرنے کے لیے آپریشن کیے جا رہے ہیں۔

ڈیلی اردو کو حکام نے بتایا کہ ہلاک دہشت گردوں کا تعلق کالعدم تحریک طالبان پاکستان کے گنڈاپور گروپ سے تھا۔