کراچی: سی ٹی ڈی اور حساس ادارے کی کارروائی، 5 دہشت گرد گرفتار

کراچی (نمائندہ ڈیلی اردو) پاکستان کے صوبہ سندھ کے دارالحکومت کراچی میں کاؤنٹر ٹیررازم ڈیپارٹمنٹ (سی ٹی ڈی) اور حساس ادارے نے مشترکہ کارروائی کرتے ہوئے کالعدم تنظیم بلوچ ریپبلکن گارڈ (بی آر جی) کے پانچ دہشت گردوں کو گرفتار کر لیا ہے۔

ڈی آئی جی سی ٹی ڈی غلام اظفر مہیسر اور ایس ایس پی آپریشنز عرفان بہادر نے پریس کانفرنس میں بتایا کہ یہ کارروائی ایک بڑے دہشت گردانہ منصوبے کو ناکام بنانے کے لیے کی گئی۔ گرفتار ملزمان میں کمانڈر جھنور، علی جان، نور محمد، جامک اور نیاز شامل ہیں۔ ان کے قبضے سے بارودی مواد، آئی ای ڈی اور اسلحہ بھی برآمد ہوا۔

ڈی آئی جی کے مطابق، گرفتار دہشت گردوں کا تعلق پڑوسی ملک سے ہے، جہاں سے انہیں فنڈنگ اور معاونت فراہم کی جاتی تھی۔ ملزمان نے تفتیش کے دوران اعتراف کیا کہ گزشتہ چند ماہ میں انہوں نے شکارپور اور جیکب آباد میں چھ کم شدت کے دھماکے کیے، جن میں ریلوے ٹریکس اور ٹرین کی بوگیوں کو نقصان پہنچا۔ خاص طور پر 18 جون 2025 کو جیکب آباد، 28 جولائی 2025 کو شکارپور، اور 7 اکتوبر کو جعفر ایکسپریس پر حملے سمیت دسمبر 2025 اور جنوری 2026 کی تخریب کاریوں کا بھی اعتراف کیا۔

غلام اظفر مہیسر نے بتایا کہ یہ دہشت گرد لہڑی، بلوچستان سے تربیت حاصل کر کے واپس کراچی آتے تھے، اور وہاں سے بارودی مواد حاصل کرتے تھے۔ قانون نافذ کرنے والے اداروں کی نظروں سے بچنے کے لیے یہ ملزمان بارودی مواد فیملیز کے ہمراہ منتقل کرتے تھے۔

سی ٹی ڈی حکام کا کہنا ہے کہ تکنیکی بنیادوں پر اس نیٹ ورک کی شناخت انتہائی مہارت سے کی گئی، اور اب ان کے سہولت کاروں اور سرپرستوں کی گرفتاری کے لیے وفاقی حساس اداروں کے ساتھ ٹیمیں تشکیل دی گئی ہیں۔

ڈی آئی جی نے مزید کہا کہ سال 2025 میں سندھ میں دہشت گردی کا کوئی بڑا واقعہ نہیں ہوا، جو تمام اداروں کی دن رات محنت کا نتیجہ ہے، اور عید کے موقع پر فی الحال کوئی بڑی سیکیورٹی تھریٹ موجود نہیں۔