کراچی سے کالعدم تحریک طالبان پاکستان کا انتہائی مطلوب کمانڈر گرفتار

کراچی (ڈیلی اردو) کاؤنٹر ٹیررازم ڈپارٹمنٹ (سی ٹی ڈی) سندھ نے کراچی میں کارروائی کے دوران کالعدم تنظیم تحریک طالبان پاکستان کے امیر و کمانڈر عزت من ولد اسفند یار خان کو گرفتار کرلیا۔

سی ٹی ڈی سندھ نے کالعدم تحریک طالبان پاکستان کا انتہائی مطلوب کمانڈر عزت خان کو گرفتار کرلیا۔ سی ٹی ڈی کے مطابق گرفتار دہشت گرد کمانڈر سابق وفاقی وزیر افضل لالا کے گھر اور سیکیورٹی فورسز کے اہلکاروں پر حملوں میں بھی ملوث تھا۔#CTD #TTP #Sindh #Pakistan

— Shabbir Hussain Turi (@ShabbirTuri) December 8, 2023

انچارج سی ٹی ڈی خرم وارث کے مطابق دہشت گرد نے خواجہ خیل چیک پوسٹ پر پاک فوج کے 3 جوانوں کو ہلاک کیا تھا اور یہ دہشت گرد سوات کے سابق وزیر افضل لالہ کے گھر پر حملے میں بھی ملوث ہے۔

خرم وارث کا بتانا ہے کہ گرفتار دہشت گرد سے اسلحہ اور گولہ بارود برآمد کیا گیا ہے، گرفتار دہشتگرد مٹہ پولیس اسٹیشن پر حملے کے بعد اسلحہ چھین کر فرار ہوا تھا اور یہ ایف سی کیمپ اور کانجو ایئر پورٹ پر حملے میں بھی ملوث ہے۔

انچارج سی ٹی ڈی کے مطابق دہشت گرد عزت من نے تحصیل مٹہ سخرہ میں فائرنگ کر کے 15 افراد کو ہلاک کیا اور اس نے سخرہ گاؤں کے فضل الحق کالج پر بھی حملہ کیا تھا۔