کراچی میں سی ٹی ڈی کا گھر پر چھاپہ، 4 عسکریت پسند ہلاک، 2 اہلکار زخمی

کراچی (نمائندہ ڈیلی اردو) پاکستان کے صوبہ سندھ کے دارالحکومت کراچی کے علاقے شاہ لطیف ٹاؤن میں کاؤنٹر ٹیررازم ڈیپارٹمنٹ (سی ٹی ڈی) نے ایک گھر پر خفیہ اطلاع کی بنیاد پر چھاپہ مارا، جہاں فائرنگ کے تبادلے میں چار عسکریت پسند ہلاک ہو گئے جبکہ دو اہلکار زخمی ہو گئے۔

محکمہ انسدادِ دہشت گردی کے مطابق کارروائی گزشتہ ماہ بارودی مواد کے ساتھ گرفتار کیے گئے عسکریت پسندوں سے حاصل ہونے والی معلومات کی روشنی میں کی گئی۔ زیرِ حراست ملزمان کی نشاندہی پر شاہ لطیف ٹاؤن کے ایک مکان پر چھاپہ مارا گیا۔

حکام کا کہنا ہے کہ جیسے ہی نفری نے گھر کو گھیرے میں لیا تو اندر موجود ملزمان نے اچانک فائرنگ شروع کر دی۔ فائرنگ کے نتیجے میں دو اہلکار زخمی ہو گئے جبکہ گرفتار کیے گئے کچھ ملزمان بھی گولیوں کی زد میں آ کر زخمی ہوئے۔

جوابی کارروائی کے دوران ایک عسکریت پسند موقع پر ہلاک ہو گیا جبکہ زخمی ہونے والے تین دیگر ملزمان اسپتال منتقل کیے جا رہے تھے تاہم وہ راستے میں ہلاک ہو گئے۔ ہلاک ہونے والوں میں جلیل، نیاز اور حمدان شامل ہیں جبکہ ایک کی شناخت کی کوشش کی جا رہی ہے۔

کارروائی کے دوران گھر سے خودکار رائفل، ایک مختصر خودکار ہتھیار، پانچ دستی بم اور بڑی مقدار میں بارودی مواد برآمد ہوا۔ بم ناکارہ بنانے والے عملے نے موقع پر پہنچ کر برآمد شدہ بارودی مواد کو محفوظ طریقے سے ناکارہ بنا دیا۔

محکمہ انسدادِ دہشت گردی کے مطابق چند عسکریت پسند اندھیرے اور گلیوں کا فائدہ اٹھاتے ہوئے فرار ہو گئے جن کی گرفتاری کے لیے علاقے میں ناکہ بندی کر دی گئی ہے اور سرچ کارروائیاں جاری ہیں۔

ڈی آئی جی سی ٹی ڈی اظفر مہیسر نے بتایا کہ زیرِ حراست ملزمان سے تفتیش کا سلسلہ جاری تھا اور انہی انکشافات کی بنیاد پر یہ کارروائی عمل میں لائی گئی۔ انہوں نے کہا کہ شہر میں دہشت گردی کے نیٹ ورکس کے خلاف کارروائیاں تسلسل کے ساتھ جاری رہیں گی اور عوام کے جان و مال کے تحفظ کے لیے ہر ممکن اقدامات کیے جا رہے ہیں۔