کراچی میں سی ٹی ڈی کی کارروائی، کالعدم تحریک طالبان پاکستان کا دہشت گرد گرفتار

کراچی (ڈیلی اردو) کاؤنٹر ٹیررزم ڈیپارٹمنٹ (سی ٹی ڈی ) نے صوبہ سندھ کے دارالحکومت کراچی میں کارروائی کرتے ہوئے کالعدم تنظیم ٹی ٹی پی کے دہشت گرد کو گرفتار کرلیا۔

تفصیلات کے مطابق کراچی کے منگھو پیر روڈ پر نورس چورنگی کے قریب سی ٹی ڈی نے خفیہ اطلاع پر کارروائی کے دوران کالعدم تحریک طالبان پاکستان (ٹی ٹی پی) کے دہشت گرد ولی رحمٰن کو گرفتار کرلیا۔

ترجمان سی ٹی ڈی کے مطابق گرفتار دہشت گرد ولی رحمٰن کے قبضے سے دستی بم برآمد ہوا ہے۔

ترجمان نے بتایا کہ گرفتار دہشت گرد کا تعلق کمانڈر عظمت اللہ عرف طارق گروپ سے ہے، دہشت گرد ولی رحمٰن نے ہلاک قاری حسین سے خودکش حملے کی ٹریننگ لی تھی۔

ترجمان نے مزید کہا کہ دہشت گرد ولی رحمٰن گرفتاری کے خوف سے 2009ء میں دبئی فرار ہو گیا تھا، ولی رحمٰن پر مقدمہ درج کر کے مزید تفتیش شروع کر دی ہے۔