کراچی میں سی ٹی ڈی کی کارروائی، کالعدم سپاہ محمد کا دہشت گرد گرفتار

کراچی (س ط ع ش) کاؤنٹر ٹیررازم ڈیپارٹمنٹ ( سی ٹی ڈی ) نے کارروائی کرتے ہوئے صوبہ سندھ کے صوبائی حکومت کراچی سے کالعدم تنظیم سپاہ محمد کے مبینہ دہشت گرد کو گرفتار کرلیا ہے۔

سی ٹی ڈی نے ابوالحسن اصفہانی روڈ میں کارروائی کی اور مبینہ دہشت گرد سید مظہر علی نقدی کو گرفتار کر کے اس کے قبضے سے ٹی ٹی پستول، 4 گولیاں اور لوڈ میگزین برآمد کرلیے۔

سی ٹی ڈی حکام کے مطابق گرفتاری کے وقت ملزم واردات کے نیت سے جا رہا تھا، اس نے اپنے ساتھیوں کے ساتھ ملکر مخالف تنظیم کے افراد کے قتل کی وارداتوں میں ملوث ہونے کا انکشاف کیا ہے، اس کے دو ساتھی پہلے ہی گرفتار ہو چکے ہیں۔

سی ٹی ڈی حکام کے مطابق گرفتار ملزم اوراس کے ساتھیوں نے گلبرگ کےعلاقےمیں مخالف تنظیم سے تعلق رکھنے والے اعجاز نامی شخص کو قتل کیا، جس کا گلبرگ تھانے میں مقدمہ الزام نمبر 94/326 بجرم دفعہ 34/302 درج ہے۔

گرفتار ملزم نے اپنے ساتھیوں کے ساتھ مل کر انچولی کے علاقے میں فائرنگ کی جس میں ایک شخص ہلاک اور دو افراد زخمی ہوئے تھے۔ واقعے کا مقدمہ الزام نمبر 95/110 بجرم دفعہ 34/302 کے تحت گلبرگ میں درج ہے۔

گرفتار ملزم اپنے ساتھیوں کی گرفتاری کے بعد ملتان فرار ہو گیا تھا اور وقفے وقفے سے کراچی آتا جاتا تھا اور اب دوبارہ دہشت گردی کے لیے لڑکوں کو منظم کرنے کی کوشش کررہا تھا۔