کراچی میں فائرنگ سے شیعہ علماء کونسل کے رہنما کا بیٹا سمیت 2 افراد ہلاک، 3 شدید زخمی

کراچی (نمائندہ ڈیلی اردو) پاکستان کے صوبے سندھ کے صوبائی دارالحکومت کراچی کے علاقے گلستان جوہر پہلوان گوٹھ میں نامعلوم مسلح افراد کی اندھا دھند فائرنگ سے دو افراد ہلاک اور تین شدید زخمی ہو گئے۔ پولیس کے مطابق ابتدائی شواہد ٹارگٹ کلنگ کی جانب اشارہ کر رہے ہیں۔

پولیس نے ہلاک ہونے والوں کی شناخت سید مظہر عباس اور علی وارث کے ناموں سے کی ہے، جن میں علی وارث شیعہ علماء کونسل سندھ کے نائب صدر علامہ رجب علی بنگش کے بیٹے تھے۔ زخمیوں میں علی حسن، محمد علی اور حبیب شامل ہیں جنہیں قریبی اسپتال منتقل کر دیا گیا ہے۔

پولیس افسر اسد رضا کے مطابق واقعہ اس وقت پیش آیا جب مقتولین ایک تیل کی دکان پر بیٹھے تھے کہ ملزمان نے کار اور موٹرسائیکلوں پر سوار ہو کر اندھا دھند فائرنگ شروع کر دی۔

مجلس وحدت مسلمین کے ترجمان سید علی احمد زیدی نے واقعے کو فرقہ وارانہ ٹارگٹ کلنگ قرار دیتے ہوئے کہا کہ دونوں مقتولین کا تعلق اہل تشیع مکتب فکر سے تھا اور ان کا تعلق پاراچنار اور کوہاٹ سے تھا۔

واقعے کے خلاف علاقہ مکینوں نے احتجاج کرتے ہوئے سڑک بند کر دی، تاہم بعد ازاں احتجاج ختم کر کے ٹریفک بحال کر دی گئی۔ پولیس اور رینجرز کی بھاری نفری موقع پر پہنچی اور علاقے کو گھیرے میں لے کر شواہد اکٹھے کیے۔

پولیس کے مطابق فائرنگ میں ایک سے زائد ہتھیاروں کا استعمال ہوا اور جائے وقوعہ سے ایک میگزین اور گولیوں کے خول برآمد ہوئے ہیں۔ واقعے کی تفتیش جاری ہے جبکہ متعدد مشتبہ افراد کو حراست میں لیا گیا ہے۔

سندھ کے وزیر داخلہ ضیا لنجار نے ایس ایس پی ایسٹ سے رپورٹ طلب کرتے ہوئے ملزمان کی فوری گرفتاری کی ہدایت جاری کی ہے۔

پولیس کے مطابق علاقے میں سیکیورٹی سخت کر دی گئی ہے اور تفتیش کو مختلف زاویوں سے آگے بڑھایا جا رہا ہے۔