کراچی میں یوم آزادی پر تخریب کاری کا منصوبہ ناکام، ایس آر اے کے 2 دہشت گرد گرفتار

کراچی (ڈیلی اردو) سندھ پولیس نے وفاقی انٹیلی جنس ایجنسی کے ہمراہ گلشنِ حدید کے علاقے جوکھیو گوٹھ میں خفیہ اطلاع پر کارروائی کر کے یوم آزادی کے موقع پر دہشت گردی کی منصوبہ بندی کرنے والے ایس آر اے کے دو مبینہ دہشت گردوں کو گرفتار کر لیا۔

سینئر سپرنٹنڈنٹ پولیس ملیر عرفان بہادر کے مطابق کراچی میں دہشتگردی کی منصوبہ بندی کی خفیہ اطلاع پر وفاقی انٹیلی جنس ایجنسی اور ملیر پولیس نے اسٹیل ٹاؤن تھانے کی حدود گلشن حدید سمار جوکھیو گوٹھ میں کارروائی کرکے 2 ملزمان اکرام چانڈیو اور شیراز سومرو کو گرفتار کر لیا، ملزمان کے قبضے سے دو دستی بم برآمد ہوئے۔

پولیس کے مطابق دوران تفتیش ملزمان نے کراچی میں یوم آزادی کے موقع پر دہشت گردی کی منصوبہ بندی کا اعتراف کیا ہے۔ ایس ایس پی عرفان بہادر نے بتایا کہ ملزمان کا تعلق کالعدم تنظیم سندھودیش روولیوشنری آرمی (ایس آر اے) سے ہے۔