کرم: انٹیلی جنس بیسڈ آپریشن میں 5 طالبان عسکریت پسند ہلاک، گاڑی تباہ

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع کرم کی تحصیل سینٹرل کرم میں سکیورٹی فورسز نے انٹیلی جنس بیسڈ آپریشن کے دوران کالعدم تحریک طالبان پاکستان (ٹی ٹی پی) سے تعلق رکھنے والے 5 عسکریت پسندوں کو ہلاک کر دیا۔

سرکاری ذرائع کے مطابق یہ کارروائی رات تقریباً 9 بجے اس وقت کی گئی جب سکیورٹی فورسز نے خفیہ اطلاع پر توڑہ پل کے علاقے میں ایک مشتبہ گاڑی کو روکا۔ گاڑی میں سوار ٹی ٹی پی سے وابستہ عسکریت پسندوں نے فرار ہونے کی کوشش کی، تاہم فورسز نے بروقت اور مؤثر کارروائی کرتے ہوئے انہیں نشانہ بنایا۔

آپریشن کے دوران عسکریت پسندوں کی گاڑی کو بھی مکمل طور پر تباہ کر دیا گیا۔ ذرائع کا کہنا ہے کہ ہلاک ہونے والے عسکریت پسند دہشت گردی کی مختلف کارروائیوں میں مطلوب تھے۔

ذرائع کے مطابق ہلاک عسکریت پسندوں کا تعلق کالعدم تنظیم کے کاظم گروپ سے بتایا جا رہا ہے۔ 

سکیورٹی فورسز نے سینٹرل کرم کے مختلف علاقوں میں سینیٹائزیشن اور سرچ آپریشن شروع کر دیا ہے تاکہ ممکنہ طور پر موجود دیگر دہشت گردوں کی تلاش مکمل کی جا سکے اور علاقے کو مکمل طور پر محفوظ بنایا جا سکے۔