کرم کے متاثرین عارضی کیمپوں میں مشکلات کا شکار

کرم (نمائندہ ڈیلی اردو) پاکستان کے شورش زدہ صوبے خیبر پختونخواہ کے قبائلی ضلع کرم کے مختلف علاقوں سے نقل مکانی کرنے والے ہزاروں افراد لوئر کرم میں قائم عارضی کیمپوں اور دیگر مقامات پر کسمپرسی کی زندگی گزارنے پر مجبور ہیں۔ متاثرین نے حکومت سے فوری واپسی اور بنیادی سہولیات کی فراہمی کا مطالبہ کیا ہے۔

تفصیلات کے مطابق سنٹرل کرم کے علاقوں تورغر جوگے، جودرہ، علی شیرزئی اور زیمشت سے چار ماہ قبل مخدوش صورتحال کے باعث نقل مکانی کرنے والے ہزاروں افراد تاحال اپنے گھروں کو واپس نہیں جا سکے۔

کیمپ انتظامیہ کے مطابق اس وقت پانچ سو سے زائد رجسٹرڈ خاندان عارضی کیمپ میں مقیم ہیں، جبکہ بڑی تعداد میں متاثرین اپنے رشتہ داروں یا کرایہ کے مکانات میں رہائش پذیر ہیں۔

کیمپ میں مقیم افراد شدید مشکلات کا شکار ہیں۔ پینے کے صاف پانی، صحت، تعلیم اور دیگر بنیادی سہولیات کی کمی بدستور برقرار ہے، جس کے باعث خواتین، بچوں اور بزرگوں کو سخت مسائل درپیش ہیں۔

متاثرین کا کہنا ہے کہ دو ہفتے قبل وزیر اعلیٰ خیبر پختونخوا سہیل خان آفریدی نے کیمپ کا دورہ کیا اور مسائل کے فوری حل کی یقین دہانی کرائی تھی، تاہم اب تک عملی اقدامات سامنے نہیں آئے۔

متاثرین نے مطالبہ کیا ہے کہ انہیں جلد از جلد باعزت طور پر اپنے علاقوں میں واپس جانے کا موقع فراہم کیا جائے، کیمپوں میں بنیادی سہولیات مہیا کی جائیں اور کیمپ سے باہر مقیم خاندانوں کو بھی خیمے فراہم کیے جائیں تاکہ وہ باقاعدہ طور پر کیمپوں میں منتقل ہو سکیں۔