کرم، ہنگو، شمالی اور جنوبی وزیرستان میں پولیس اور سکیورٹی فورسز کے آپریشنز

پشاور (نمائندگان ڈیلی اردو ) پاکستان کے شورش زدہ صوبے خیبرپختونخوا اور قبائلی علاقوں میں سکیورٹی فورسز نے مختلف کارروائیوں کے دوران دہشت گردوں کے ٹھکانوں کو نشانہ بنایا، متعدد دہشت گردوں کو ہلاک یا گرفتار کیا اور بھاری اسلحہ برآمد کیا۔

ہنگو پولیس کا بڑا آپریشن

ضلع ہنگو کے تھانہ دوابہ اور عظیم آباد درسمند میں پولیس نے ٹارگٹڈ آپریشن کیا، جس کے دوران دہشت گرد عمر ولد محمد امین کو گرفتار کر لیا گیا۔ پولیس کے مطابق اس کارروائی میں بھاری اسلحہ و بارودی مواد برآمد ہوا، جس میں مشین گن، ایم فور رائفل، ریپیٹرز، رائفلز، پستول، ہینڈ گرنیڈز، کارتوس اور دیگر سامان شامل ہے۔ گرفتار دہشت گرد کو مزید تفتیش کے لیے نامعلوم مقام منتقل کر دیا گیا ہے۔

کرم میں تڑالی پوسٹ پر شدت پسندوں کا حملہ

قبائلی ضلع کرم میں سکیورٹی فورسز کی تڑالی پوسٹ پر کالعدم تحریک طالبان پاکستان کے شدت پسندوں نے فائرنگ کی، جس کے نتیجے میں 6 اہلکار زخمی ہو گئے۔ زخمیوں کو فوری طور پر طبی امداد کے لیے صدہ ہسپتال منتقل کیا گیا ہے۔

شمالی وزیرستان: دہشت گرد کا گھر مسمار

قبائلی ضلع  شمالی وزیرستان کی تحصیل دتہ خیل کے علاقے سید آباد میں سکیورٹی فورسز نے کارروائی کے دوران دہشت گرد رحمان بہادر کے گھر کو مسمار کر دیا۔ رحمان بہادر متعدد دہشت گردانہ واقعات میں مطلوب تھا۔

جنوبی وزیرستان میں 3 دہشت گرد ہلاک

قبائلی ضلع جنوبی وزیرستان کے علاقوں نرگسائی اور کراباغ میں سکیورٹی فورسز نے پاکستانی طالبان کے ٹھکانوں کو نشانہ بنایا، جس کے نتیجے میں تین دہشت گرد مارے گئے جبکہ متعدد زخمی ہو گئے۔