کمبوڈیا کے فوجی اڈے میں دھماکا، 20 فوجی ہلاک، متعدد زخمی

(ڈیلی اردو/بی بی سی) کمبوڈیا کے ایک فوجی اڈے پر ہونے والے دھماکے کے نتیجے میں میں 20 فوجی اہلکار ہلاک اور متعدد زخمی ہوگئے ہیں۔

بی بی سی کی رپورٹ کے مطابق وزیر اعظم ہن مانیٹ نے کہا کہ انہیں ملک کے جنوبی صوبے کمپونگ سپیو میں ہفتے کو ہونے والے دھماکے سے گہرا صدمہ پہنچا ہے۔

Cambodia blast: 20 soldiers killed in ammunition explosion https://t.co/K8y8eh3ibQ

— BBC News (World) (@BBCWorld) April 27, 2024

تاہم دھماکے کی وجوہات کے حوالے سے کوئی وضاحت نہیں کی گئی۔

وزیر اعظم نے حکومت کو ہدایت کی ہے کہ وہ مرنے والے فوجیوں کے اہل خانہ کے ساتھ ساتھ زخمی فوجیوں کو معاوضہ ادا کرے۔

فیس بک پر ایک بیان میں وزیر اعظم ہن مانیٹ نے کہا کہ وہ ہلاک ہونے والے فوجیوں کے اہل خانہ سے گہری تعزیت کا اظہار کرنا چاہتے ہیں۔

سوشل میڈیا پر موجود غیر تصدیق شدہ فوٹیج میں متعدد دھماکوں کی آوازیں سنی جا سکتی ہیں، دیگر تصاویر میں ایک تباہ شدہ گودام، ایک تباہ شدہ فوجی ٹرک اور طبی عملے کے زیر علاج بچے کو دکھایا گیا ہے۔

کمبوڈیا کی فوج نے بتایا کہ دھماکے نے ہتھیاروں سے بھرا ہوا ٹرک تباہ کر دیا۔

فرانسیسی خبر رساں ادارے اے ایف پی کے مطابق دھماکے سے ایک دفتر کی عمارت کے ساتھ ساتھ قریبی بیرکوں کو بھی نقصان پہنچا جس سے قریبی 25 گھر متاثر ہوگئے۔

ہلاک ہونے والوں کے لواحقین کو 20 ہزار ڈالر جبکہ زخمی فوجیوں کو 5 ہزار ڈالر ملیں گے۔

یاد رہے کہ 2005 میں بٹمبنگ کے قریب ایک فوجی اسلحہ ڈپو میں دھماکے کے نتیجے میں پانچ کمبوڈین ہلاک اور تین زخمی ہوگئے تھے۔