کوئٹہ میں بلوچ لبریشن آرمی کے 5 مبینہ دہشت گرد ہلاک

کوئٹہ (بیورو رپورٹ) بلوچستان کے صوبائی حکومت کوئٹہ کے مغربی بائی پاس پر کاؤنٹر ٹیررازم ڈیپارٹمنٹ (سی ٹی ڈی) کی کارروائی میں کالعدم تنظیم بلوچ لبریشن آرمی (بی ایل اے) کے 5 مبینہ دہشت گرد ہلاک ہو گئے۔

سی ٹی ڈی ترجمان کے مطابق کوئٹہ کے نواحی علاقے نیوکاہان مری کیمپ میں دہشت گردوں کے خلاف آپریشن خفیہ اطلاع پر کیا گیا۔ سکیورٹی فورسز اور دہشتگردوں کے درمیان فائرنگ کے تبادلے میں 5 دہشتگرد ہلاک ہوئے۔ ملزمان کے زیر استعمال مکان میں سے ان کے زیر استعمال اسلحہ وگولہ بارود بھی قبضے میں لے لیا گیا۔

کارروائی میں سیکیورٹی فورسز کا کوئی جانی نقصان نہیں ہوا جبکہ ہلاک دہشتگردوں میں سے تین کی شناخت کالعدم تنظیم بلوچ لبریشن آرمی کے اہم رکن ہنگل مری عرف لیلا، آفتاب جتک عرف واشین اور شاہ نواز زہری عرف سارانگ کے طور پر ہوئی ہے، دو ہلاک دہشتگردوں کی شناخت کیلئے انھیں ہسپتال منتقل کیا گیا ہے۔

ہلاک دہشت گرد سیکیورٹی فورسز پر حملوں اور شہریوں کے قتل میں ملوث تھے۔