کوئٹہ میں پیپلز پارٹی کے انتخابی دفتر پر دستی بم حملہ، 5 افراد زخمی

کوئٹہ (ڈیلی اردو) صوبہ بلوچستان کے صوبائی دارالحکومت کوئٹہ کے علاقے سریاب روڈ پر پیپلز پارٹی کے انتخابی دفتر پر دستی بم حملے میں 5 افراد زخمی ہوگئے ہیں۔

تفصیلات کے مطابق پولیس نے بتایا کہ دھماکے میں زخمی ہونے والوں کو سول ہسپتال منتقل کردیا گیا ہے، حملےکے وقت پیپلز پارٹی کے حلقہ پی بی 45 کے نامزد امیدوار و سابق صوبائی وزیر علی مدد جتک بھی دفتر موجود تھے تاہم وہ اس حملے میں محفوظ رہے۔

پیپلز پارٹی کے رہنما علی مدد جتک کا کہنا تھا کہ وہ اس وقت دفتر میں موجود تھے جب دھماکا ہوا اور وہ یہاں سے کسی کارنر میٹنگ میں شرکت کی تیاری کر رہے تھے۔

انہوں نے کہا کہ وہ کسی سے ڈرنے والے نہیں ہیں، ان کی جماعت کی لیڈر شپ نے قربانیاں دی ہیں وہ بھی انہی کے نقش کے قدم پر ہیں۔

دوسری جانب ضلع کیچ کے علاقے بلیدہ میں بھی پیپلز پارٹی کے امیدوار ظہور بلیدی کے گھر پردستی بم حملہ کیا گیا۔

ڈپٹی کمشنر حسین جان کے مطابق دستی بم ظہور بلیدی کےگھر کے اندر گر کر پھٹ گیا تاہم کوئی جانی نقصان نہیں ہوا۔

ادھر ضلع سبی کے مین بازار میں دستی بم کا دھماکا ہوا تاہم کوئی جانی نقصان نہیں ہوا۔

پولیس کے مطابق سبی کے علاقے ریذیڈینسی روڈ پر ٹریفک پولیس کی چوکی پر نامعلوم موٹر سائیکل سواروں نے دستی بم پھینکا جس کے پھٹننے سے زوردار دھماکا ہوا اور چوکی کو نقصان پہنچا تاہم معجزانہ طور پر کوئی جانی نقصان نہیں ہوا۔

یاد رہے کہ گزشتہ روز صوبہ بلوچستان کے شہر سبی میں جناح روڈ پر پاکستان تحریک انصاف (پی ٹی آئی) کی ریلی کے قریب دھماکا ہوا تھا جس کے نتیجے میں 4 افراد ہالک اور پانچ زخمی ہو گئے تھے۔