کوئٹہ: کالعدم بلوچ لبریشن آرمی نے شعبان سے 10 افراد کو اغوا کرلیا

کوئٹہ (ڈیلی اردو) صوبہ بلوچستان کے صوبائی حکومت کوئٹہ کے نواحی علاقے زرغون غر میں شعبان کے مقام واقع پکنک پوائنٹ سے کالعدم تنظیم نے 10 افراد کو اغوا کرلیا۔

تفصیلات کے مطابق کوئٹہ کے نواحی علاقے شعبان سے مسلح افراد کی جانب سے 10 افراد کو اغوا کرنے کی اطلاعات ہیں۔ حکام کے مطابق ذرائع کا کہنا ہے کہ بدھ کو مسلح افراد نے ایک پکنک پوائنٹ کا گھیراؤ کیا اور لوگوں کے شناختی کارڈ چیک کیے۔

عینی شاہدین کے مطابق مسلح افراد نے پہلے چودہ افراد کو حراست میں لیا۔ لیکن چار کو چھوڑ کر 10 کو اپنے ساتھ لے گئے۔ حکام نے اس معاملے پر فی الحال کوئی تفصیلات فراہم نہیں کی ہیں۔ کالعدم علیحدگی پسند تنظیم بی ایل اے نے ایک بیان میں 10 افراد کو حراست میں لینے کی ذمہ داری قبول کی ہے۔

لیویز ذرائع نے بتایا کہ مغویوں میں پنجاب کے رہائشی شامل ہیں۔

یاد رہے کہ 13 اپریل کو صوبہ بلوچستان کے ضلع نوشکی میں نامعلوم افراد کی فائرنگ سے پنجاب سے تعلق رکھنے والے 9 افراد سمیت کُل 11 افراد ہلاک اور 5 زخمی ہوگئے تھے۔

بلوچستان کے ضلع نوشکی کے ڈپٹی کمشنر حبیب اللہ موسی خیل نے کہا تھا کہ 12 اپریل کی رات 10 سے 12 مسلح افراد نے نوشکی تفتان شاہراہ این-40 پر سلطان چڑھائی کے قریب ناکہ بندی کی، مسلح افراد مختلف گاڑیوں کی چیکنگ کرتے رہے۔

ڈپٹی کمشنر نے بتایا کہ مسلح افراد نے تفتان جانیوالی بس روک کر مسافروں کے شناختی کارڈ چیک کیے، شناخت پریڈ کے بعد 9 مسافروں کو اغوا کیا گیا۔

ڈپٹی کمشنر نوشکی کاکہنا تھا کہ اطلاع ملنے پر پولیس، لیویز اور دیگر قانون نافذ کرنے والے اداروں کی بھاری نفری موقع پر پہنچ گئی تھی جس کے بعد نوشکی پولیس نے جائے وقوعہ کے قریب ایک پل کے نیچے سے اغوا کیے گئے 9 افراد کی لاشیں برآمد کرلی تھیں۔