کوہاٹ: پولیس کا مختلف علاقوں میں سرچ آپریشن، 47 افراد گرفتار، بھاری مقدار میں اسلحہ برآمد

کوہاٹ (ڈیلی اردو) صوبہ خیبر پختونخوا کے ضلع کوہاٹ میں پولیس نے شہر کے مختلف علاقوں میں سرچ آپریشن کرتے ہوئے 47 مشتبہ افراد کو گرفتار کرلیا۔ ملزمان کے قبضے سے بھاری مقدار میں اسلحہ برآمد کرلیا۔

پولیس نے گرفتار افراد کے قبضے سے 4 کلاشنکوفیں، 3 رپیٹر، 5 بندوقیں، 2 رائفلیں، 7 پستول اور سینکڑوں کارتوس برآمد کیے ہیں۔

ڈی پی او کیپٹن (ر) واحد محمود کے مطابق سرچ آپریشن کوہاٹ کے علاقوں شینو خیل، گڑھی بہرام خان، شاہ آباد، بنگش آباد، حافظ آباد اور جرونڈہ روڈ کے علاقوں میں کیا گیا۔

سرچ اینڈ اسٹرائیک آپریشن میں گرفتار ہونے والے 47 مشتبہ افراد کے علاوہ اشتہاری مجرموں کے 4 سہولت کار بھی حراست میں لیے گئے ہیں۔

گرفتار افراد کو چھان بین اور تفتیش کے لیے تھانہ سٹی منتقل کر دیا گیا ہے۔