یمن حوثیوں کا اسرائیل پر ہائپر سونک میزائل، بئر السبع و ایلات پر ڈرون حملوں کا دعویٰ

یروشلم + صنعا (ڈیلی اردو/نیوز ایجنسیاں) اسرائیلی میڈیا کے مطابق یمن سے داغا گیا ایک ڈرون جنوبی اسرائیلی شہر ایلات میں گر کر تباہ ہو گیا۔ اسرائیلی فوج کے زیرِ انتظام چلنے والے ’’آرمی ریڈیو‘‘ نے دعویٰ کیا کہ یہ ڈرون شہر کے ایک ہوٹل سے جا ٹکرایا۔

اسرائیلی پولیس نے اعلان کیا ہے کہ ڈرون گرنے کی اطلاع کے بعد ایلات ڈسٹرکٹ پولیس کی فورسز موقع پر پہنچ گئیں اور علاقے کو گھیرے میں لے لیا گیا۔ بم ڈسپوزل اسکواڈ کے ماہرین ڈرون کی ساخت اور نوعیت کا جائزہ لے رہے ہیں۔

فوجی حکام نے واقعے کے بعد اپنے ترجمان کی متوقع بریفنگ مؤخر کر دی اور کہا کہ اسرائیل نے یمن سے داغا گیا ایک میزائل فضا میں ہی مار گرایا۔ فوج کے مطابق میزائل اور ڈرون حملوں کے دوران اسرائیل کے کئی علاقوں میں ہنگامی صورتحال کا اعلان کرنے والے سائرن بجائے گئے۔

ادھر یمن کے حوثی باغیوں نے اسرائیل کے خلاف ’’تین مختلف انداز کی فوجی کارروائیوں‘‘ کا اعلان کیا ہے۔

حوثیوں کے جاری کردہ بیان میں کہا گیا ہے کہ ان کی میزائل فورس نے اپنی ایک کارروائی میں ’’فلسطین 2 ہائپر سونک بیلسٹک میزائل‘‘ استعمال کیا، جس کا ہدف اسرائیل کے ساحلی شہر یافا میں واقع ایک حساس فوجی تنصیب تھی۔

بیان میں مزید کہا گیا کہ ڈرون فورس نے بھی دو کارروائیاں کیں۔ پہلی کارروائی میں تین ڈرونز کے ذریعے اُم الرشراش (ایلات) کے علاقے میں مختلف اہداف کو نشانہ بنایا گیا، جبکہ دوسری کارروائی میں فلسطین کے جنوبی شہر بئر السبع میں ایک حساس ہدف کو ایک ڈرون سے نشانہ بنایا گیا۔

حوثیوں کے مطابق ان تمام کارروائیوں میں ’’کامیابی سے اپنے اہداف کو نشانہ بنایا گیا۔‘‘

یہ پیش رفت ایسے وقت میں ہوئی ہے جب حوثی ملیشیا حالیہ مہینوں میں یمن سے اسرائیل کے خلاف اپنے میزائل اور ڈرون حملے تیز کر چکی ہے۔ اسرائیلی فوج کا کہنا ہے کہ وہ یمن سے لانچ کیے جانے والے ان حملوں کو فضائی دفاعی نظام کے ذریعے ناکام بنانے کی کوشش کر رہی ہے، تاہم بعض ڈرونز اسرائیلی حدود میں گرنے میں کامیاب ہو جاتے ہیں۔