یمن سے داغا گیا میزائل مار گرایا، اسرائیلی فوج

تل ابیب (ڈیلی اردو ) اسرائیلی فوج کا کہنا ہے کہ اس نے یمن سے اسرائیل کی جانب داغے جانے والے ایک میزائل حملے کو ناکام بنا دیا ہے۔

اسرائیلی فوج کی جانب سے ٹیلی گرام پوسٹ میں کہا گیا، ’’کچھ دیر قبل اسرائیل کے متعدد علاقوں میں سائرن بجائے گئے، اس دوران یمن سے داغے گئے میزائل کو روک دیا گیا۔‘‘

ایرانی حمایت یافتہ حوثی باغیوں نے اسرائیل پر میزائل داغنے کا سلسلہ جاری رکھا ہوا ہے۔ ان کا دعویٰ ہے کہ یہ حملے غزہ میں فلسطینیوں کے ساتھ یکجہتی کے طور پر کیے جا رہے ہیں۔

ان حملوں کے جواب میں اسرائیل نے 6 مئی کو صنعا میں یمن کے اہم ایئرپورٹ پر فضائی حملہ کیا تھا جس سے ایئرپورٹ کو شدید نقصان پہنچا تھا اور متعدد افراد ہلاک ہو گئے تھے۔