آبنائے ہرمز میں ایرانی پاسدارانِ انقلاب کا تیل بردار جہاز پر حملے کا دعویٰ، آگ لگنے کی اطلاع

تہران(ڈیلی اردو) ایرانی پاسدارانِ انقلاب نے دعویٰ کیا ہے کہ آبنائے ہرمز سے گزرنے کی کوشش کرنے والے ایک بڑے تیل بردار جہاز کو نشانہ بنایا گیا، جس کے نتیجے میں اس میں آگ بھڑک اٹھی۔ ایرانی بحریہ کے بیان کے مطابق جہاز نے اپنے شناختی اور نگرانی کے نظام بند کر رکھے تھے اور پاسدارانِ انقلاب کی بحریہ کی جانب سے جاری کردہ تنبیہات کو بھی نظر انداز کیا تھا۔

دوسری جانب برطانوی میری ٹائم ٹریڈ آپریشنز ادارے نے بتایا کہ اتوار کے روز آبنائے ہرمز میں مختلف اقسام کے چار بحری جہازوں، جن میں ایک تیل بردار جہاز، خام تیل لے جانے والا ٹینکر، تیل کی مصنوعات منتقل کرنے والا جہاز اور ایک کنٹینر بردار جہاز شامل ہیں، کو نامعلوم سمت سے آنے والے گولہ بارود یا دیگر پرتابی ہتھیاروں سے نشانہ بنائے جانے کی اطلاعات موصول ہوئیں۔

ادارے نے اتوار اور پیر کی درمیانی شب سلطنت عمان کی بندرگاہ صحار کے قریب ایک تیل بردار جہاز پر ڈرون حملے کی اطلاع بھی دی تھی۔ رپورٹ کے مطابق عمانی حکام نے متاثرہ جہاز کے عملے کو بحفاظت نکالنے میں مدد فراہم کی۔

رپورٹ کے مطابق جنگ شروع ہونے کے بعد سے ایران آبنائے ہرمز سے گزرنے والے متعدد جہازوں کو نشانہ بنا چکا ہے، جس سے اس اہم بحری گزرگاہ میں تجارتی آمدورفت کی سلامتی کو خطرات لاحق ہیں۔ تاہم ایرانی پاسدارانِ انقلاب کے تازہ دعوے میں نشانہ بننے والے جہاز کی شناخت، عملے کی صورت حال اور نقصان کی مکمل تفصیلات سامنے نہیں آئیں۔