آبنائے ہرمز میں دو آئل ٹینکروں میں آگ لگنے کا ایرانی دعویٰ، ایک بارودی سرنگ سے ٹکرا گیا

تہران (ڈیلی اردو) ایران کے پاسدارانِ انقلاب کی بحریہ نے دعویٰ کیا ہے کہ آبنائے ہرمز سے اس کے مقرر کردہ راستے کے بجائے متبادل راستوں سے گزرنے کی کوشش کے دوران دو آئل ٹینکروں میں دھماکوں کے بعد آگ بھڑک اٹھی، جس کے نتیجے میں دونوں جہازوں کو سفر روکنا پڑا۔

ایرانی بیان کے مطابق ایک سپر ٹینکر آبنائے ہرمز کے جنوبی حصے میں مبینہ طور پر بحری بارودی سرنگ سے ٹکرا گیا، جس کے بعد اس میں دھماکا ہوا اور آگ لگ گئی۔ دوسرے ٹینکر کے بارے میں دعویٰ کیا گیا کہ وہ امریکی لڑاکا طیاروں کی مدد سے مشرقی حصے سے خفیہ طور پر گزرنے کی کوشش کر رہا تھا کہ ایک نامعلوم حادثے کے باعث آگ کی لپیٹ میں آگیا۔

پاسدارانِ انقلاب کے مطابق دونوں جہازوں نے اپنی شناخت اور رہنمائی کے نظام بند کر رکھے تھے۔ ایرانی بحریہ نے خبردار کیا ہے کہ اس کے مقرر کردہ بحری راستوں کی خلاف ورزی کرنے والے جہازوں کو خطرات کا سامنا کرنا پڑ سکتا ہے۔

ترک خبر رساں ادارے انادولو کے مطابق ایرانی بیان میں متاثرہ جہازوں کے نام، ان کے پرچم، عملے کی حالت یا ممکنہ جانی نقصان کی تفصیلات نہیں بتائی گئیں۔ امریکی فوج کی جانب سے بھی دوسرے ٹینکر کو لڑاکا طیاروں کی معاونت فراہم کرنے کے ایرانی دعوے کی فوری تصدیق نہیں کی گئی۔

یہ واقعات ایسے وقت میں سامنے آئے ہیں جب امریکہ اور ایران کے درمیان کشیدگی کے باعث آبنائے ہرمز میں تجارتی جہازوں کی آمدورفت شدید متاثر ہے۔ خبر رساں ادارے ایسوسی ایٹڈ پریس کے مطابق گزشتہ ہفتے بھی اس آبی گزرگاہ میں متعدد ٹینکروں کو نقصان پہنچنے اور آگ لگنے کے واقعات رپورٹ ہوئے، تاہم ان میں سے بعض واقعات کی تفصیلات اور ایرانی دعوؤں کی آزادانہ تصدیق نہیں ہوسکی۔