بلوچستان: آواران میں سکیورٹی فورسز کی انٹیلی جنس بیسڈ کارروائی، بی ایل اے کے 9 دہشتگرد ہلاک، ٹھکانہ تباہ

آواران (ڈیلی اردو) پاکستان کے صوبہ بلوچستان کے ضلع آواران میں سکیورٹی فورسز نے انٹیلی جنس معلومات کی بنیاد پر کارروائی کرتے ہوئے کالعدم بلوچ لبریشن آرمی (بی ایل اے) کے 9 دہشتگردوں کو ہلاک کر دیا، جبکہ کارروائی کے دوران دہشتگردوں کے مبینہ ٹھکانے کو بھی تباہ کر دیا گیا۔

دستیاب تفصیلات کے مطابق کارروائی 10 نومبر کو آپریشن ردالفتنہ 3 کے تحت کی گئی۔ سکیورٹی ذرائع کے مطابق علاقے میں بی ایل اے کے مسلح دہشتگردوں کی موجودگی کی اطلاع پر ان کے ٹھکانے کو نشانہ بنایا گیا۔ اس کارروائی میں مسلح کواڈ کاپٹر استعمال کیا گیا، جس کے ذریعے مبینہ طور پر ٹھکانے پر درست نشانہ لگایا گیا اور وہاں موجود 9 دہشتگرد ہلاک ہوگئے۔

رپورٹس کے مطابق کارروائی کا بنیادی مقصد دہشتگردوں کے خفیہ ٹھکانے کو تباہ کرنے کے ساتھ علاقے میں ان کے نیٹ ورک اور آپریشنل سرگرمیوں کو نقصان پہنچانا تھا۔ ٹھکانے کی تباہی سے دہشتگردوں کی نقل و حرکت اور مبینہ کارروائیوں کے لیے استعمال ہونے والے ایک اہم مقام کو ختم کر دیا گیا۔

بلوچستان کے مختلف اضلاع میں سکیورٹی فورسز کی جانب سے دہشتگردوں کے خلاف انٹیلی جنس بیسڈ آپریشنز کا سلسلہ جاری ہے، جن کا مقصد دہشتگردوں کے ٹھکانوں، نیٹ ورکس اور کارروائیوں کی صلاحیت کو ختم کرکے علاقے میں امن و امان کی صورتحال بہتر بنانا ہے۔

تاہم اس مخصوص کارروائی میں ہلاک ہونے والے افراد کی شناخت اور دیگر تفصیلات کے حوالے سے مزید سرکاری معلومات سامنے نہیں آئی ہیں۔