آبنائے ہرمز میں دو تیل بردار جہاز نامعلوم پروجیکٹائل کی زد میں

تہران(ڈیلی اردو) آبنائے ہرمز کے قریب دو الگ الگ واقعات میں تیل بردار جہازوں کو نامعلوم پروجیکٹائل سے نشانہ بنائے جانے کے بعد خطے میں بحری سلامتی سے متعلق خدشات میں اضافہ ہوگیا ہے۔

برطانیہ کی میری ٹائم سیکیورٹی ایجنسی یو کے میری ٹائم ٹریڈ آپریشنز کے مطابق پہلے واقعے میں ایک تیل بردار جہاز آبنائے ہرمز سے گزر رہا تھا کہ اسے نامعلوم پروجیکٹائل نے نشانہ بنایا۔ حملے کے نتیجے میں جہاز پر معمولی آگ لگی اور اس کا بجلی کا نظام متاثر ہوا، تاہم عملے نے آگ پر قابو پالیا اور جہاز نے اپنا سفر جاری رکھا۔

برطانوی حکام کے مطابق واقعے میں عملے کا کوئی رکن زخمی نہیں ہوا جبکہ سمندر میں تیل یا کسی دوسرے مواد کے اخراج کی بھی اطلاع نہیں ملی۔

دوسرے واقعے میں چند گھنٹے بعد عمان کے مشرقی علاقے میں ایک خام تیل بردار جہاز کو بھی نامعلوم پروجیکٹائل کا نشانہ بنایا گیا۔ حکام کے مطابق اس واقعے میں بھی عملہ محفوظ رہا اور کسی ماحولیاتی نقصان کی اطلاع سامنے نہیں آئی۔

یو کے میری ٹائم ٹریڈ آپریشنز نے دونوں واقعات کی تحقیقات شروع کردی ہیں، تاہم ابتدائی اطلاعات میں یہ واضح نہیں کیا گیا کہ پروجیکٹائل کس نوعیت کے تھے اور ان حملوں کے پیچھے کون ملوث ہے۔

آبنائے ہرمز خلیج سے عالمی منڈیوں تک تیل اور گیس کی ترسیل کا ایک انتہائی اہم بحری راستہ ہے۔ خطے میں بڑھتی ہوئی فوجی کشیدگی کے دوران تجارتی جہازوں کو لاحق خطرات نے اس گزرگاہ کی بحری سلامتی کو ایک بار پھر عالمی توجہ کا مرکز بنا دیا ہے۔