آبنائے ہرمز نہ کھلی تو ایرانی بجلی گھر اور پُل تباہ کر دینگے، امریکی صدر ٹرمپ

واشنگٹن (ڈیلی اردو/روئٹرز/اے ایف پی/اے پی) امریکی صدر ڈونلڈ ٹرمپ نے ایران کے بجلی گھروں اور پلوں پر حملوں کی دھمکی دہراتے ہوئے کہا ہے کہ اگر آبنائے ہرمز بحری جہازوں کے لیے نہ کھولی گئی تو ایران کے شہری انفراسٹرکچر کو نشانہ بنایا جائے گا۔

اتوار کی صبح اپنی ایک سوشل میڈیا پوسٹ میں ٹرمپ نے کہا کہ اگر یہ آبی گزرگاہ نہ کھولی گئی تو ایران ’’جہنم میں جی رہا ہو گا۔‘‘

ٹرمپ نے لکھا، ’’منگل کو ایران میں بجلی گھروں اور پُلوں (کی تباہی) کا دن ہو گا۔ آبنائے ہرمز کھولو، ورنہ تم جہنم میں جیو گے، بس دیکھتے رہو!‘‘۔۔

دوسی جانب ایران کی مشترکہ فوجی کمان نے اتوار کو خبردار کیا کہ اگر امریکہ اور اسرائیل نے ایرانی شہری تنصیبات پر حملے کیے تو خلیجی ممالک اور اسرائیل میں تیل کی تنصیبات کے ساتھ ساتھ دیگر شہری بنیادی ڈھانچے کے خلاف کارروائیاں تیز کر دی جائیں گی۔

ایران کی سرکاری خبر رساں ایجنسی 'ارنا' کے مطابق ختم الانبیاء ہیڈکوارٹر نے بتایا، “ہم ایک بار پھر دہراتے ہیں اگر آپ نے دوبارہ جارحیت کی اور شہری تنصیبات کو نشانہ بنایا تو ہمارا جواب اور زیادہ سخت ہوگا۔”

آبنائے ہرمز عالمی توانائی کی فراہمی کے لیے انتہائی اہمیت کی حامل ہے۔ امریکہ اور اسرائیل کی جانب سے 28 فروری کو ایران کے خلاف جنگ کے آغاز کے بعد سے ایران نے اس آبنائے کو بند کر رکھا ہے۔

امریکی صدر اس اہم آبی گزرگاہ کو کھولنے کے لیے ایران کو کئی بار الٹی میٹم دے کر مہلت بڑھا چکے ہیں۔ گزشتہ ہفتے انہوں نے ایران کے ساتھ ’’مثبت مذاکرات‘‘ کا حوالہ دیتے ہوئے یہ ڈیڈلائن چھ اپریل تک بڑھا دی تھی۔