احمد آباد بم دھماکے کیس: بھارتی سپریم کورٹ نے محمد تنویر کی سزائے موت روکنے کے فیصلے کو برقرار رکھنے کا حکم دےدیا

دہلی (ڈیلی اردو) بھارت کی سپریم کورٹ نے 2008 کے احمد آباد سلسلہ وار بم دھماکوں کے مقدمے میں سزائے موت پانے والے محمد تنویر کی پھانسی کو روکنے کے فیصلے کو برقرار رکھنے کا حکم دیا ہے۔ عدالت نے مقدمے کا اصل ریکارڈ طلب کرتے ہوئے گجرات حکومت اور جیل حکام کو بھی متعلقہ رپورٹس مقررہ مدت میں جمع کرانے کی ہدایت کی ہے۔

بھارتی میڈیا رپورٹس کے مطابق جسٹس وکرم ناتھ، جسٹس سندیپ مہتا اور جسٹس اپریش کمار سنگھ پر مشتمل بینچ نے محمد تنویر کی درخواست پر سماعت کی۔ تنویر نے گجرات ہائی کورٹ کے فیصلے کو چیلنج کیا تھا، جس میں احمد آباد بم دھماکوں کے مقدمے میں 38 ملزمان کی سزائے موت برقرار رکھی گئی تھی۔

عدالت نے 9 اکتوبر کے حکم میں محمد تنویر کی سزائے موت پر روک برقرار رکھنے کی ہدایت کی اور ماتحت عدالت سمیت گجرات ہائی کورٹ سے مقدمے کا اصل ریکارڈ طلب کر لیا۔ سپریم کورٹ نے گجرات حکومت کو ہدایت کی کہ تنویر سے متعلق پروبیشن افسران کی تمام رپورٹس آٹھ ہفتوں کے اندر پیش کی جائیں۔ متعلقہ جیل سپرنٹنڈنٹ کو بھی اسی مدت میں رپورٹ جمع کرانے کا حکم دیا گیا، جس میں قیدی کے کام، طرزِ عمل اور جیل میں اس کے برتاؤ کی تفصیلات شامل ہوں گی۔ مقدمے کی آئندہ سماعت 12 ہفتوں کے اندر متوقع ہے۔

احمد آباد میں 26 جولائی 2008 کو تقریباً 70 منٹ کے دوران مختلف مقامات پر 21 بم دھماکے ہوئے تھے۔ ان حملوں میں 56 افراد ہلاک جبکہ 200 سے زائد زخمی ہوئے تھے۔ ان دھماکوں کو بھارت میں ہونے والے بڑے سلسلہ وار حملوں میں شمار کیا جاتا ہے۔

گجرات ہائی کورٹ نے سزائے موت برقرار رکھنے کے فیصلے میں حملوں کے نتیجے میں ہونے والی ہلاکتوں، سازش کی وسعت اور بڑے پیمانے پر خوف و ہراس پھیلانے کے پہلوؤں کو اہم قرار دیا تھا۔