اسرائیلی فضائیہ کے دو اہلکار ایران کو حساس معلومات دینے کے الزام میں گرفتار

یروشلم (ڈیلی اردو) اسرائیلی فضائیہ کے 2 اہلکاروں پر ایران کے لیے جاسوسی کے الزام میں فردِ جرم عائد کر دی گئی ہے، جبکہ دونوں پر حساس معلومات دشمن کو فراہم کرنے کا الزام بھی ہے۔

اسرائیلی اخبار ہارٹز کے مطابق اسرائیلی فضائیہ کے 2 ٹیکنیشنز کو مبینہ طور پر ایران کی انٹیلی جنس کے لیے کام کرنے کے الزام میں گرفتار کیا گیا۔

اسرائیلی فوج کے بیان میں کہا گیا ہے کہ دونوں اہلکاروں پر سنگین سکیورٹی نوعیت کے الزامات عائد کیے گئے ہیں، جن میں دشمن کی معاونت اور حساس معلومات کی ترسیل شامل ہے۔

بیان کے مطابق ایک اہلکار پر غیر ملکی ایجنٹ سے براہ راست رابطے اور دوسرے پر اس رابطے میں معاونت کا الزام ہے۔

تحقیقات میں یہ بھی سامنے آیا ہے کہ ایک اہلکار نے مبینہ طور پر ایرانی ایجنٹ کو فوجی تربیتی مواد فراہم کیا، جس میں جنگی طیاروں کے نظام سے متعلق معلومات اور فوجی اڈے کی ویڈیوز شامل تھیں۔