اسرائیلی فوج کی فائرنگ سے دو بھائیوں سمیت 3 فلسطینی ہلاک

غزہ (ڈیلی اردو) مغربی کنارے میں اسرائیلی فوج کی جارحیت میں مزید 3 فلسطینی نوجوان مارے گئے جن میں 2 بھائی بھی شامل ہیں۔

عالمی خبر رساں ادارے کے مطابق مغربی کنارے کے علاقے رام اللہ میں اسرائیلی فوج نے دو بھائیوں 21 سالہ ظافر عبدالرحمان اور 22 سالہ جواد عبدالرحمان کو گولیاں مار کر بیدردی سے قتل کردیا۔

ایک اور واقعے میں اسرائیلی فوج نے بیت امر میں ایک فلسطینی نوجوان کو گولیاں مار کر شدید زخمی کردیا جسے اسپتال لے جایا گیا تاہم زیادہ خون بہہ جانے کے باعث نوجوان جانبر نہ ہوسکا۔

بیت امر میں ہلاک ہونے والے نوجوان کی شناخت نہیں ہوسکی۔ ایک دن میں اسرائیلی فوج کی فائرنگ سے ہلاک ہونے والے نوجوانوں کی تعداد 3 ہوگئی۔

اسرائیلی فوج کی بڑھتی ہوئی جارحیت کا اندازہ اس بات سے لگایا جا سکتا ہے کہ رواں برس اب تک 125 سے زائد فلسطینی نوجوان مارے جا چکے ہیں جو 1967 میں اسرائیلی قبضے کے بعد سے ایک سال میں اب تک کی سب سے بڑی تعداد ہے۔