اسرائیل اور شام کا امریکی ثالثی میں خصوصی رابطہ نظام قائم کرنے پر اتفاق

واشنگٹن (ڈیلی اردو) اسرائیل اور شام نے امریکا کی ثالثی میں ایک خصوصی رابطہ نظام (رابطہ سیل) قائم کرنے پر اتفاق کر لیا ہے، جس کا مقصد انٹیلی جنس اور سفارتی روابط کو مؤثر بنانا، کشیدگی میں کمی لانا اور ممکنہ سکیورٹی معاہدے کی راہ ہموار کرنا ہے۔

اس حوالے سے امریکا، اسرائیل اور شام کی جانب سے مشترکہ بیان جاری کیا گیا، جس میں کہا گیا ہے کہ یہ رابطہ نظام فوجی کشیدگی میں کمی، سفارتی روابط کے فروغ اور تجارتی مواقع پیدا کرنے میں مدد دے گا۔

بیان کے مطابق اسرائیل اور شام کے درمیان گزشتہ ایک سال سے وقفے وقفے سے مذاکرات جاری تھے، جن کا مقصد ایک ایسا سکیورٹی فریم ورک تیار کرنا تھا جو شام پر اسرائیل کے مسلسل حملوں کے خاتمے میں معاون ثابت ہو سکے۔

مشترکہ بیان میں کہا گیا کہ نیا میکنزم کسی بھی ممکنہ تنازعے کو فوری طور پر حل کرنے اور غلط فہمیوں سے بچاؤ کے لیے ایک مؤثر پلیٹ فارم کے طور پر کام کرے گا۔

یہ پیش رفت پیرس میں اسرائیلی اور شامی حکام کے درمیان حالیہ ملاقاتوں کے بعد سامنے آئی ہے، جن میں شامی وزیر خارجہ بھی شریک تھے۔

امریکا نے اسرائیل اور شام کے درمیان اس پیش رفت کو مشرق وسطیٰ میں دیرپا امن کی جانب ایک اہم قدم قرار دیا ہے۔

واضح رہے کہ اسرائیل نے 1967 سے شامی گولان کی پہاڑیوں پر غیر قانونی قبضہ کر رکھا ہے، جبکہ گزشتہ ایک سال کے دوران اس نے مزید شامی علاقوں پر بھی قبضہ کیا، جن میں اسٹریٹجک جبل الشیخ بھی شامل ہے۔ اسرائیل نے شامی وزارتِ دفاع پر بھی حملے کیے ہیں۔

اسرائیل نئی شامی قیادت کو مسلسل انتہا پسند قرار دیتا رہا ہے، تاہم امریکی صدر ڈونلڈ ٹرمپ کھل کر شامی صدر کی حمایت کر چکے ہیں۔