اسرائیل کے فضائی حملوں میں دو ایرانی میزائل انجینئرز ہلاک

واشنگٹن (ڈیلی اردو رپورٹ) اسرائیل کے دو مختلف فضائی حملوں میں ایرانی بیلسٹک میزائل کے ماہر سعید شمغدری، جو ایران کے موشکی پروگرام سے منسلک انجینئر تھے، اور سید محمد نوید قریشی، جو ایران کے سپیس ریسرچ انسٹی ٹیوٹ سے وابستہ سینئر میزائل انجینئر اور محقق تھے، ہلاک ہو گئے۔

رپورٹس کے مطابق شمغدری کو تہران میں ان کے گھر پر ہلاک کیا گیا، اور حملے میں ان کے اہل خانہ بھی ہلاک ہوئے۔ نوید قریشی بھی ایک فضائی سٹرائیک میں مارے گئے۔

یہ حملے ایسے وقت میں ہوئے جب ایران اور اسرائیل کے درمیان کشیدگی میں اضافہ دیکھا جا رہا ہے، اور ایرانی تنصیبات پر حملوں کی اطلاعات موصول ہو رہی ہیں۔

اسرائیلی فوج نے ایران کے دارالحکومت تہران میں ’وسیع پیمانے پر‘ فضائی حملے کیے ہیں۔

پاسداران انقلاب کے حامی خبر رساں ادارے فارس سمیت ایران کے سرکاری میڈیا نے شہر کے کئی مقامات پر دھماکوں کی اطلاعات دی ہیں۔

فارس کے مطابق: ’دھماکوں کی خوفناک آوازوں کی اطلاعات ملی ہیں۔‘

اسرائیل ڈیفنس فورسز (آئی ڈی ایف) کا کہنا ہے کہ تہران میں ’دہشت گردوں کے انفراسٹرکچر‘ کو نشانہ بنایا جا رہا ہے۔

ایرانی صوبے مشرقی آذربائیجان کے ڈائریکٹر جنرل آف ڈیزاسٹر مینجمنٹ نے کہا ہے کہ تبریز پر حالیہ امریکی اور اسرائیلی حملوں کے نتیجے میں ’چھ افراد ہلاک اور چھ زخمی‘ ہوئے۔

مجید فرشی نے کہا کہ آج صبح کے حملوں میں ’نصر ٹاؤن کی رہائشی عمارت میں چار افراد ہلاک اور چھ زخمی ہوئے۔‘

ان کے مطابق، رشیدی کوارٹر کے ایک پارک پر ایک اور حملے میں دو افراد ہلاک ہوئے۔

آج صبح تبریز میں کئی شدید دھماکوں کی رپورٹس سوشل میڈیا پر شائع ہوئیں، اور بسیج سے منسلک دانشجو نیوز ایجنسی نے ایک تباہ شدہ رہائشی عمارت کی تصاویر شائع کیں۔

اسرائیلی فوج نے دعویٰ کیا ہے کہ اس نے تہران پر حملوں کے دوران ایران کے پاسدارانِ انقلاب کے مرکزی سکیورٹی ہیڈ کوارٹر کو نشانہ بنایا ہے۔

اسرائیلی فوج کی جانب سے جاری بیان میں کہا گیا ہے کہ پاسدارانِ انقلاب کا ہیڈکوارٹر فوجیوں کی سرگرمیوں کو ہم آہنگ کرنے اور حالات کا جائزہ لینے لیے استعمال کیا جاتا تھا۔ ’یہاں سے بسیج بٹالینز کو بھی ہدایات دی جاتی تھیں۔‘

بیان میں مزید کہا گیا ہے کہ: ’حملے سے قبل شہریوں کو پہنچنے والے نقصان کو کم کرنے کے لیے اقدامات کیے گئے تھے جن میں پریسیشن گولہ بارود کا استعمال، فضائی نگرانی، اور اضافی انٹیلی جنس شامل ہیں۔‘