امریکا نے 55 ایرانی شہریوں کو ڈی پورٹ کر دیا، تہران کا احتجاج

تہران (ڈیلی اردو) ایران کی جانب سے کہا گیا ہے کہ امریکہ سے ملک بدر کیے گئے 55 ایرانی شہری آئندہ چند روز میں وطن واپس پہنچیں گے۔ یہ صدر ڈونلڈ ٹرمپ کی سخت گیر امیگریشن پالیسیوں کے تحت ہونے والی دوسری بڑی ملک بدری ہے۔ اس سے قبل ستمبر میں ایک سو بیس ایرانی تہران واپس بھیجے گئے تھے جبکہ امریکہ مجموعی طور پر تقریباً 400  ایرانیوں کو ملک بدر کرنے کا ارادہ رکھتا ہے۔

ایرانی وزارتِ خارجہ کے ترجمان اسماعیل بقائی نے کہا کہ امریکی اقدامات سیاسی محرکات اور مہاجر مخالف پالیسیوں پر مبنی ہیں جو بین الاقوامی قوانین کے خلاف ہیں۔

ترجمان نے یہ بھی شکایت کی کہ امریکہ نے فٹ بال ورلڈ کپ قرعہ اندازی میں شرکت کے لیے ایران کے تمام وفد کو ویزے فراہم نہیں کیے۔

ایران نے نو ویزوں کی درخواست کی تھی مگر صرف چار ایرانی اہلکاروں کو ویزے جاری کیے گئے، جن میں کوچ اردشیر امیر قالینی شامل ہیں۔ امریکہ طویل عرصے سے ایرانی شہریوں پر سخت ویزہ پابندیاں برقرار رکھے ہوئے ہے۔