امریکہ نے ایران کے خلاف سائبر جنگ کا اعلان کر دیا: ایرانی جنرل غلام رضا جلالی

تہران (ڈیلی اردو/نیوز ایجنسی) ایرانی شہری دفاعی تنظیم کے محکمہ شہری دفاع کے سربراہ اور سپاہِ پاسداران انقلاب کے سینیر کمانڈر بریگیڈیئر جنرل غلام رضا جلالی نے کہا کہ امریکا نے ایران کی تنصیبات اور بنیادی ڈھانچے کے خلاف سائبر جنگ کا آغاز کر دیا۔

تفصیلات کے مطابق اپنے ایک بیان میں محکمہ شہری دفاع کے سربراہ اور سپاہِ پاسداران انقلاب کے سینیر کمانڈر بریگیڈیئر جنرل غلام رضا جلالی کا کہنا تھا کہ امریکی ڈرون مار گرانے امریکیوں نے ایران کی مختلف تنصیبات پر سائبر حملے شروع کر رکھے ہیں۔

غیرملکی خبررساں ادارے کے مطابق انہوں نے کہا کہ امریکا نے ایرانی سائبر انفراسٹرکچر پر باضابطہ طور پر سائبر جنگ مسلط کر رکھی ہے، 20 جون کو ایرانی فوج کی طرف سے امریکا کے ایک ڈرون کو مار گرائے جانے کے بعد امریکیوں نے ایران کے بنیادی ڈھانچے، قدرتی گیس اور بجلی کی تنصیبات پر سائبر حملے شروع کر رکھے ہیں۔

غیر ملکی میڈیا نے دعویٰ کیا ہے کہ امریکی صدر کے حکم پر ایرانی پاسداران انقلاب کے اڈوں، کمپیوٹر سسٹم کو نشانہ بنانا اور ایرانی میزائلوں کو کنٹرول کرنے والے کمپیوٹر نظام میں خلل ڈالنا ہے، جس کے تحت سائبر حملے کیے جارہے ہیں۔

تاہم رضا جلالی نے دعویٰ کیا کہ امریکا اپنے مقاصد میں ناکام ہے، ان کا کہنا تھا کہ ایرانی دفاعی فورسز نے امریکی کے سائبر حملے مکمل ناکام بنا دیے ہیں، آگے بھی بناتے رہیں گے۔