امریکہ کا کوئی بھی حملہ علاقائی جنگ کو جنم دے گا، ایرانی سپریم لیڈر خامنہ ای

تہران (ڈیلی اردو/ نیوز ایجنسیاں) ایران کے سپریم لیڈر آیت اللہ علی خامنہ ای نے اتوار کو خبردار کیا ہے کہ امریکہ کی جانب سے کوئی بھی حملہ مشرقِ وسطیٰ میں ’’علاقائی جنگ‘‘ کو جنم دے گا۔

86 سالہ آیت اللہ علی خامنہ ای کے یہ بیانات اب تک کے سب سے براہِ راست انتباہ قرار دیے جا رہے ہیں۔ دوسری جانب امریکی صدر ڈونلڈ ٹرمپ بحیرۂ عرب میں طیارہ بردار بحری جہاز یو ایس ایس ابراہم لنکن اور دیگر امریکی جنگی جہاز تعینات کر چکے ہیں۔

تاحال یہ واضح نہیں کہ صدر ٹرمپ ایران کے خلاف طاقت کا استعمال کریں گے یا نہیں۔ وہ اس سے قبل متعدد بار کہہ چکے ہیں کہ ایران مذاکرات کا خواہاں ہے۔

ایرانی سرکاری ٹیلی وژن کے مطابق آیت اللہ خامنہ ای نے کہا،“ امریکیوں کو معلوم ہونا چاہیے کہ اگر انہوں نے جنگ شروع کی تو اس بار یہ علاقائی جنگ ہو گی۔”

بیان میں مزید کہا گیا،“ ہم حملہ آور نہیں ہیں اور نہ ہی کسی ملک پر حملہ کرنے کے خواہشمند ہیں، لیکن ایرانی قوم، جو بھی اس پر حملہ کرے گا یا اسے ہراساں کرے گا، اسے سخت جواب دے گی۔”