اورکزئی میں جھڑپ، امن لشکر کے 2 افراد اور 3 شدت پسند ہلاک

اورکزئی (نمائندہ ڈیلی اردو) پاکستان کے شورش زدہ صوبے خیبرپختونخوا کے قبائلی ضلع اورکزئی میں جھڑپ کے دوران امن لشکر کے دو افراد ہلاک جبکہ تین مسلح شدت پسند ہلاک ہو گئے۔

پولیس کے مطابق اپر اورکزئی کے علاقے یخ کنڈاو میں امن لشکر اور مسلح گروہ کے درمیان جھڑپ ہوئی، جس کے نتیجے میں امن لشکر کے دو افراد زرکاوی اور ممتاز ملا ہلاک ہوئے، جبکہ مسلح گروہ کے متعدد اراکین زخمی بھی ہوئے۔

ایس ڈی پی او محبوب خان نے واقعے کی تصدیق کرتے ہوئے بتایا کہ امن لشکر پر حملے میں دو افراد ہلاک اور تین زخمی ہوئے، جبکہ امن لشکر کی جوابی کارروائی میں تین شدت پسند بھی ہلاک ہوئے۔

افغانستان سے متصل یہ شمال مغربی علاقہ گزشتہ کئی دہائیوں سے شدت پسندانہ سرگرمیوں کا مرکز رہا ہے۔