اورکزئی میں دو غیر ملکی دہشت گرد گرفتار، داعش خراسان سے تعلق کا انکشاف

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع اورکزئی کے علاقے غلجو بازار میں پولیس نے دو مشتبہ غیر ملکی افراد کو گرفتار کر لیا ہے۔ 

گرفتار افراد کا تعلق آذربائیجان سے بتایا گیا ہے اور ان کی شناخت غور ولد کاظم اور یونس ولد محمد کے نام سے ہوئی ہے۔

پولیس کے مطابق ابتدائی تفتیش میں ان افراد کے داعش خراسان (ISIS-K) سے تعلق کے شواہد سامنے آئے ہیں۔ 

پولیس حکام کا کہنا ہے کہ دونوں افراد علیشیرزئی، کرم سے پیدل راستے کے ذریعے غلجو بازار میں داخل ہوئے تھے۔

تفتیشی افسران کا کہنا ہے کہ یہ کارروائی اس وقت ممکن ہوئی جب مشکوک سرگرمیوں کی اطلاعات ملیں۔ گرفتار افراد سے مزید معلومات حاصل کرنے کے لیے ان سے تفصیلی پوچھ گچھ جاری ہے۔ 

پولیس کا کہنا ہے کہ اس مقدمے میں مزید اہم انکشافات متوقع ہیں اور اس کے بعد ممکنہ طور پر دہشتگردی کے بڑے نیٹ ورک تک رسائی حاصل کی جا سکے گی۔

پولیس اور سکیورٹی فورسز نے شہریوں سے اپیل کی ہے کہ وہ مشکوک سرگرمیوں کی اطلاع فوری طور پر متعلقہ حکام کو دیں تاکہ کسی بھی ممکنہ خطرے کو بروقت روکا جا سکے۔