اورکزئی میں سیکیورٹی فورسز کی گاڑی پر دھماکا، 2 اہلکار ہلاک، 5 زخمی

واشنگٹن (ش ح ط) پاکستان کے قبائلی ضلع اورکزئی کے علاقے ماموزئی روڈ پر سیکیورٹی فورسز کی گاڑی کو ریموٹ کنٹرول بم سے نشانہ بنایا گیا، جس کے نتیجے میں 2 ایف سی اہلکار ہلاک جبکہ 5 زخمی ہو گئے۔

ذرائع کے مطابق دھماکہ آج صبح 10:30 بجے تورسمت روڈ پر پیش آیا، جہاں فرنٹیئر کور (ایف سی) 216 ونگ کی گاڑی کو نشانہ بنایا گیا۔ دھماکے کے فوراً بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا۔

ہلاک ہونے والے اہلکاروں کی شناخت حوالدار الطاف اور سپاہی خیردین کے نام سے ہوئی، جن کا تعلق کرک اور وزیرستان سے بتایا جا رہا ہے۔ زخمی اہلکاروں میں نائک عزیز، سپاہی حاضر، راج ولی، جبریل اور شاہد شامل ہیں، جنہیں طبی امداد کے لیے قریبی اسپتال منتقل کر دیا گیا ہے۔

تاحال کسی گروہ نے حملے کی ذمہ داری قبول نہیں کی۔ سیکیورٹی فورسز واقعے کی تحقیقات کر رہی ہیں۔