ایران کا اسرائیلی انتخابات پر تبصرہ، تہران کو کسی بھی امیدوار کی کامیابی سے فرق نہیں پڑتا: اسماعیل بقائی

تہران (ڈیلی اردو) ایران نے اسرائیل میں ہونے والے انتخابات پر ردعمل دیتے ہوئے کہا ہے کہ تہران کے لیے اس بات کی کوئی اہمیت نہیں کہ انتخابات میں کون کامیاب ہوتا ہے، کیونکہ ایرانی حکومت کے مطابق اسرائیلی قیادت کی پالیسیوں نے خطے میں تشدد اور قتل عام کو فروغ دیا ہے۔

ایرانی وزارت خارجہ کے ترجمان اسماعیل بقائی نے پیر کو اپنے بیان میں کہا کہ ایران کے لیے اس بات سے کوئی فرق نہیں پڑتا کہ اسرائیل میں ہونے والے انتخابات کے بعد کون قیادت سنبھالتا ہے۔ ان کے بقول، اسرائیلی ریاست نے خطے کو تشدد اور قتل عام کے سوا کچھ نہیں دیا۔

دوسری جانب اسرائیلی وزیر دفاع اسرائیل کاٹز نے ایران کے معاملے پر سیاسی قیادت اور فوج کے درمیان اختلافات کی خبروں کو مسترد کرتے ہوئے انہیں بے بنیاد قرار دیا۔ ان کا کہنا تھا کہ ایران سے متعلق معاملات پر ان کی، وزیراعظم بینجمن نیتن یاہو اور فوجی قیادت کے درمیان مکمل ہم آہنگی ہے۔

اسرائیلی وزیر دفاع نے مزید کہا کہ اسرائیل کی جانب سے انتخابات سے قبل ایران پر حملہ کرنے کا کوئی ارادہ نہیں تھا، تاہم ایران کی طرف سے حملے کی صورت میں اسرائیل بھرپور جواب دے گا۔ انہوں نے اپوزیشن کے بعض رہنماؤں پر الزام عائد کیا کہ وہ ان خبروں کو وزیراعظم نیتن یاہو پر تنقید کے لیے استعمال کر رہے ہیں۔