اوسلو پرائیڈ حملہ: پاکستانی نژاد نارویجین شہری عرفان بھٹی مجرم قرار، 30 سال قید

واشنگٹن (ش ح ط) ناروے کی ایک عدالت نے جمعے کے روز 2022 میں اوسلو پرائیڈ فیسٹیول کے دوران ہونے والے فائرنگ حملے کی منصوبہ بندی کے الزام میں مذہبی شدت پسند پاکستانی نژاد نارویجین شہری عرفان بھٹی کو مجرم قرار دیتے ہوئے 30 سال قید کی سزا سنا دی، جو ملکی قانون کے تحت زیادہ سے زیادہ ممکنہ سزا ہے۔

48 سالہ عرفان بھٹی اوسلو میں پیدا ہوئے، نارویجین شہریت رکھتے ہیں اور حملے کے وقت پاکستان میں موجود تھے۔ ان پر دہشت گردانہ حملے کی معاونت اور منصوبہ بندی کے الزامات عائد کیے گئے تھے، جنہیں عدالت نے شواہد کی بنیاد پر درست قرار دیا۔ تاہم بھٹی نے دورانِ سماعت خود کو بے گناہ قرار دیا اور وہ اس فیصلے کے خلاف اپیل کرنے کا حق رکھتے ہیں۔

حملے کی تفصیلات

25 جون 2022 کو ہم جنس پرستوں کے حقوق کے لیے منعقد ہونے والی اوسلو پرائیڈ پریڈ سے چند گھنٹے قبل دارالحکومت کے وسطی علاقے میں واقع معروف ’’لندن پب‘‘ اور قریبی بارز کے باہر ایک مسلح شخص نے فائرنگ کر دی تھی۔

اس واقعے میں دو افراد ہلاک اور کم از کم آٹھ شدید زخمی ہوئے، جب کہ بھگدڑ اور افراتفری کے باعث درجنوں افراد کو معمولی چوٹیں آئیں۔

حملہ آور کی شناخت ایرانی نژاد نارویجین شہری زانیار متاپور کے طور پر ہوئی تھی، جسے جولائی 2024 میں قتل اور سنگین دہشت گردی کے الزامات میں 30 سال قید کی سزا سنائی گئی تھی۔

عرفان بھٹی کا کردار

عدالت کے مطابق عرفان بھٹی نے حملے کی منصوبہ بندی اور نظریاتی معاونت کی، اگرچہ وہ براہِ راست فائرنگ میں شامل نہیں تھے۔ حملے سے قبل ہی وہ ناروے چھوڑ کر پاکستان چلے گئے تھے۔

حوالگی

عرفان بھٹی کو 3 مئی 2024 میں پاکستان سے ناروے کے حوالے کیا گیا، حالانکہ دونوں ممالک کے درمیان باضابطہ حوالگی معاہدہ موجود نہیں۔ اوسلو حکومت کی درخواست پر پاکستانی حکام نے انہیں سخت سکیورٹی میں خصوصی طیارے کے ذریعے ناروے منتقل کیا، جہاں پہنچتے ہی انہیں باقاعدہ گرفتار کر لیا گیا۔

پولیس کی ناکامی پر سوالات

2023 میں ہونے والی ایک آزادانہ تحقیقاتی رپورٹ میں انکشاف کیا گیا تھا کہ غیر ملکی انٹیلیجنس ایجنسی کی جانب سے پیشگی اطلاعات فراہم کیے جانے کے باوجود ناروے کی پولیس اس حملے کو روکنے میں ناکام رہی، حالانکہ بروقت کارروائی سے اس سانحے کو ٹالا جا سکتا تھا۔

نفسیاتی رپورٹ

مقدمے کے دوران دو فرانزک ماہرینِ نفسیات نے عدالت کو بتایا کہ عرفان بھٹی میں شدید ’’سماج مخالف ڈس آرڈر‘‘ اور سائیکوپیتھ علامات پائی جاتی ہیں، تاہم وہ اپنے افعال کی قانونی ذمہ داری سمجھنے اور اٹھانے کی مکمل صلاحیت رکھتے ہیں۔

قانونی اعتراضات

عرفان بھٹی کے وکیل جان کرسٹیان ایلڈن نے پاکستان سے حوالگی پر شدید اعتراض کرتے ہوئے کہا کہ پاکستانی سپریم کورٹ میں زیرِ سماعت کیس کے فیصلے سے قبل حوالگی بین الاقوامی قانونی اصولوں اور قانون کی بالادستی پر سوالیہ نشان ہے۔