آرمی چیف قمر جاوید باجوہ کا سدرن کمانڈ ہیڈ کوارٹرز کوئٹہ کا دورہ

راولپنڈی (ڈیلی اردو) پاک فوج کے سربراہ جنرل قمر جاوید باجوہ نے جمعہ کو سدرن کمانڈ ہیڈ کوارٹرز کا دورہ کیا۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق آرمی چیف کو خوشحال بلوچستان پروگرام کے تحت جاری منصوبوں پر بریفنگ دی گئی۔ آرمی چیف نے امن و امان کے لئے پاک فوج اور دیگر سیکورٹی اداروں کی کوششوں کو سراہا۔

آرمی چیف جنرل قمر جاوید باجوہ اور وزیر اعلیٰ بلوچستان جام کمال نے کوئٹہ میں نسٹ کیمپس کا افتتاح کیا۔ نسٹ کیمپس کا 2017ء میں اعلان کیا گیا اور دو سال میں مکمل ہوا ہے۔ پہلے مرحلے میں کیمپس سے 550 طالب علم انجینئرنگ اور کمپیوٹر سائنس کی تعلیم حاصل کریں گے۔

آرمی چیف جنرل قمر جاوید باجوہ نے مختلف تعلیمی اداروں کے طالب علموں سے خطاب بھی کیا۔ جنرل قمر جاوید باجوہ نے کہا کہ طلباء آنے والے مواقع سے فائدہ اٹھانے کے لئے خود کو تیار کریں، بلوچستان کے طالب علم بہت باصلاحیت ہیں، پاکستان امن و استحکام کی راہ پر گامزن ہے۔

انہوں نے کہا کہ پاکستانی نوجوان قومی جذبے کے ساتھ درست سمت میں سفر جاری رکھیں، مستقبل کے چیلنجز سے نبرد آزما ہونے کے لئے تمام طبقوں کو توانائیاں یکجا کرنا ہوں گی۔