ایرانی میزائل حملہ: اسرائیل میں 58 افراد زخمی

یروشلم (ڈیلی اردو)اسرائیلی ایمرجنسی سروسز نے جمعے کی علی الصبح شمالی اسرائیل کے ایک گاؤں پر ایرانی میزائل گرنے سے درجنوں افراد کے زخمی ہونے کی تصدیق کی ہے۔

ایم ڈی اے (ماگن ڈیوڈ ادوم) ایمبولینس سروس کے مطابق طبی عملے نے 58 زخمیوں کو ابتدائی طبی امداد فراہم کی اور انہیں ناصرہ کے قریب واقع مقامی ہسپتالوں میں منتقل کر دیا۔

اسرائیلی میڈیا کے مطابق ایک خاتون میزائل کے نوکدار ٹکڑے لگنے سے زخمی ہوئی ہیں جبکہ باقی 57 افراد کو شیشے کے ٹکڑوں سے معمولی نوعیت کی چوٹیں آئی ہیں۔

اسرائیلی فوج کے مطابق ہوم فرنٹ کمانڈ کے اہلکاروں کو جائے وقوعہ پر بھیج دیا گیا ہے۔ فورسز ہنگامی اور ریسکیو اداروں کے تعاون سے موقع پر صورتحال کا جائزہ لے رہی ہیں تاکہ علاقے کو کلیئر کیا جا سکے۔

اسرائیلی فوج نے تصدیق کی ہے کہ ایران کی جانب سے اسرائیل کی طرف میزائل داغے گئے جنہیں فضا میں روکنے کی کوشش کی جا رہی ہے۔ 

متاثرہ علاقوں میں شہریوں کو موبائل فونز کے ذریعے وارننگ جاری کی گئی ہے اور انہیں مزید اطلاع تک محفوظ مقامات پر رہنے کی ہدایت کی گئی ہے۔