ایران: تہران میں فضائی دفاعی نظام فعال، فائرنگ اور دھماکوں کی آوازیں

تہران (ڈیلی اردو/رائٹرز) ایرانی ذرائع ابلاغ کے مطابق دارالحکومت تہران میں فضائی دفاعی نظام کی جانب سے فائرنگ کی آوازیں سنائی دی ہیں۔

ایران کی سرکاری خبر رساں ایجنسی ارنا کے مطابق ’طیارہ شکن فائرنگ‘ کی اطلاعات تہران کے مغربی اور مشرقی دونوں حصوں سے موصول ہوئی ہیں۔

پاسدارانِ انقلاب سے وابستہ خبر رساں ایجنسی مہر کی رپورٹ میں کہا گیا ہے کہ تہران کے بعض علاقوں میں دشمن اہداف کے مقابلے کے لیے فضائی دفاعی نظام فعال رہا۔

خبر رساں ادارے رائٹرز کے مطابق تہران کے مختلف حصوں میں فضائی دفاعی نظام کے فعال ہونے کے بعد فائرنگ اور دھماکوں جیسی آوازیں سنی گئیں۔

رپورٹس میں بتایا گیا ہے کہ دفاعی نظام کی جانب سے ممکنہ طور پر دشمن کے اہداف کو نشانہ بنایا جا رہا ہے، تاہم ان اہداف کی نوعیت یا مقام کے حوالے سے کوئی باضابطہ تفصیلات جاری نہیں کی گئیں۔

تاحال حکام کی جانب سے اس صورت حال پر کوئی تفصیلی بیان سامنے نہیں آیا، جبکہ کسی جانی یا مالی نقصان کی بھی فوری طور پر تصدیق نہیں ہو سکی۔

خطے میں جاری کشیدگی کے تناظر میں اس پیش رفت کو اہم قرار دیا جا رہا ہے اور صورت حال پر قریبی نظر رکھی جا رہی ہے۔

رپورٹس کے مطابق اس سے قبل بھی شہر میں فضائی دفاعی بیٹریاں فعال کیے جانے کی اطلاعات سامنے آئی تھیں۔