ایران: تہران میں یکے بعد دیگرے پانچ دھماکے، متعدد افراد زخمی

تہران (ڈیلی اردو) ایران کے دارالحکومت تہران میں یکے بعد دیگرے پانچ دھماکوں کی آوازیں سنی گئی ہیں، جس کے بعد شہر میں خوف و ہراس پھیل گیا۔

ایرانی ذرائع ابلاغ کے مطابق دھماکے ضلع 10 تہران کے قریب سنے گئے۔

پاسدارانِ انقلاب کے مقامی کمانڈر محمد بالیدہ نے ایک ویڈیو پیغام میں کہا کہ ’غدار اور غیر محبِ وطن عناصر‘ نے ایک ’معمولی دھماکہ‘ کیا ہے، تاہم انہوں نے ذمہ دار عناصر کی نشاندہی نہیں کی۔

بعد ازاں پاسدارانِ انقلاب سے وابستہ فارس نیوز ایجنسی نے رپورٹ کیا کہ دھماکے مائع گیس سے تیار کیے گئے دو دیسی ساختہ دھماکہ خیز پیکجز کے باعث ہوئے۔

رپورٹ کے مطابق واقعے میں تین افراد معمولی زخمی ہوئے، جبکہ تین گھروں کی کھڑکیوں کے شیشے ٹوٹ گئے اور دو گاڑیوں کو جزوی نقصان پہنچا۔

حکام کے مطابق صورتحال قابو میں ہے اور مزید تحقیقات جاری ہیں۔۔